Ucuz və sadə bərk sabun gündəlik həyatda geniş istifadə olunur. Lakin ondan bir neçə nəfər, xüsusən də ictimai yerlərdə istifadə etdikdə, onun səthində mikrobların toplanıb-toplanmaması və maye sabunun daha gigiyenik seçim olub-olmaması ilə bağlı sual yaranır.
Demokrat.az-ın məlumatına görə, mütəxəssislər və həkimlər tanınmış məsləhətçi Marta Stüartın saytına bildiriblər ki, adi əl yuma zamanı bərk və maye sabun eyni dərəcədə effektivdir. Onların fikrincə, hər iki sabun növünü ev şəraitində əllərin adi qaydada yuyulması üçün effektiv hesab etmək olar. Bərk sabun dəridən mikrobların uzaqlaşdırılması üçün kifayət qədər təsirli vasitədir.
Lakin burada bəzi nüanslar var. İstifadə edilmiş bərk sabunun səthində bakteriyalar aşkar edilə bilər. 1984-cü ildə aparılmış kiçik bir araşdırmada tədqiqatçılar beş fərqli məkanda iki növ bərk və iki növ maye sabunu bir həftə ərzində araşdırıblar. Məlum olub ki, bərk sabundan götürülmüş nümunələrin 92-96 faizində aşkar edilə bilən bakteriyalar olub. Maye sabundan götürülən nümunələrdə isə bu göstərici 8 faiz təşkil edib.
Lakin sabunun üzərində bakteriyaların olması onların mütləq şəkildə əllərə keçəcəyi və ya xəstəliyə səbəb olacağı demək deyil. Farmasevt, mütəxəssis və dəriyə qulluq vasitələrinin resepturasını hazırlayan doktor Canis Kosma-Kovi bildirib: "Sabunun səthində bakteriyaların olması avtomatik olaraq onların həmin sabundan istifadə edən insana keçəcəyi demək deyil".
Doktor Kosma-Kovinin sözlərinə görə, başqa bir araşdırmada alimlər bərk sabunları bilərəkdən yüksək miqdarda bağırsaq çöpü bakteriyaları və psevdomonadlarla çirkləndiriblər. 16 iştirakçı çirkləndirilmiş sabunla əllərini yuduqdan sonra tədqiqatçılar onların əllərində araşdırılan bakteriyaların heç birini aşkar etməyiblər.
Araşdırma kiçik olub və sabunun müəyyən bir növündən istifadə edilib. Bununla belə, nəticələr sabunun bakterial çirklənməsi ilə yuma zamanı bakteriyaların faktiki olaraq ötürülməsi arasındakı fərqi göstərir.
Bərk sabunu saxlamağın ən gigiyenik yolu
Sabunu istifadələr arasında suyun süzülə və qurumasına imkan verən yerdə saxlayın. Bu, sabunun yumşalmasının və suyun yığılmasının qarşısını alacaq, həmçinin onun səthində bakteriyaların toplanmasını məhdudlaşdıra bilər. Nəm mühit sabunun səthində bakteriyaların çoxalmasına şərait yaradır.
Tibb elmləri doktoru Stiven Qoldberqin sözlərinə görə, "durğun nəmlik mikroorqanizmlərin yaşamasına imkan verən amildir". Bunun qarşısını almaq üçün suyun axmasına və havanın sərbəst dövr etməsinə imkan verən drenaj dəlikləri və ya barmaqlıqları olan sabun qablarından istifadə etmək tövsiyə olunur.
Sabunu harada saxladığınız da əhəmiyyətlidir. Onu krandan və ya duşdan daim su sıçrayan yerdə saxlamayın. Əgər hər əl yumasından sonra sabun su gölməçəsinin içində qalırsa, onu daha quru yerə qoyun.
Mütəxəssislər həmçinin sabun qabında yığılan sabun qalıqlarını yumağı və çöküntü yaranmasının qarşısını almaq üçün qabı mütəmadi təmizləməyi tövsiyə edirlər. Sabunun özündə çirk gördükdə isə onu yerinə qoymazdan əvvəl axar su altında yaxalayın.
Sabun, yoxsa duş geli – hansını seçmək daha yaxşıdır?
Həm sabunun, həm də duş gelinin dəridəki çirkləri eyni dərəcədə yaxşı həll etdiyi və dərini təmizlədiyi bildirilir. Bununla belə, duş gelləri təmizləmədən sonra dərinin təbii balansını adətən daha yaxşı bərpa edir. Buna görə də həssas dərisi olan insanlar üçün duş geli daha uyğun seçim ola bilər.
Jalə
