Müasir dünyada çox az insan mətbəxdə saatlarla vaxt keçirərək mürəkkəb yeməklər və şirniyyatlar hazırlamaq istəyir. Buna görə də aşpazlar böyük ailəni minimum vaxt ərzində qonaq etməyə imkan verən sobasız desert reseptlərini yüksək qiymətləndirirlər.
Demokrat.az xarici mediaya istinadən sizə hətta lay-lay tortlardan daha dadlı olan sadə bir şirniyyat hazırlamağı təklif edir. Üstəlik, onu uşaq belə asanlıqla hazırlaya bilər. Bu resept sübut edir ki, yeməyin dadı onun mürəkkəbliyində deyil, sadə inqrediyentləri düzgün və ləzzətli şəkildə birləşdirmək bacarığındadır.
Sobasız dadlı şirniyyat 5 dəqiqəyə
Bu şirniyyatı hazırlamaq üçün hamıya tanış olan peçenye, qatılaşdırılmış süd və kərə yağı kimi məhsullar lazım olacaq. Bu inqrediyentlərdən istifadə etmək asandır və onları istənilən mağazada tapmaq mümkündür. Nə plitəyə, nə də sobaya ehtiyacınız olacaq, lakin blender lazım olacaq.
Peçenyedən sobasız şirniyyat hazırlamaq üçün aşağıdakı inqrediyentləri götürün:
* 150 qram kərə yağı;
* 300 qram peçenye;
* bir ovuc qoz;
* 180 qram qatılaşdırılmış süd;
* üzərinə səpmək üçün qoz, küncüt, kakao və ya kokos yonqarı.
Şirniyyatın hazırlanması üçün istənilən növ peçenyedən istifadə etmək olar – qumlu, qalet, yulaflı və ya şokoladlı. Biskvitdən qalan hissələr də uyğundur. Buna görə də sobasız şirniyyat hər dəfə fərqli və özünəməxsus dada malik ola bilər.
Peçenyeni blender, ətçəkən maşın və ya paketə qoyaraq oxlov vasitəsilə xırda qırıntılara çevirin. Qozu da eyni üsulla bircins kütlə halına gətirin. Hər iki qarışığı bircins olana qədər birləşdirin.
Kərə yağını 1–2 dəqiqə ərzində rəngi açılana qədər çalın. Daha sonra qatılaşdırılmış südü qaşıq-qaşıq əlavə edin və blenderlə çalmağa davam edin. Nəticədə qatı, bircins krem alınmalıdır. Bu proses təxminən beş dəqiqə çəkəcək.
Kremi peçenye və qoz qırıntıları ilə qarışdırın. Yaş əllərlə rahat şəkildə kürəciklər hazırlaya biləcəyiniz qatı kütlə alınacaq. Əgər qarışıq həddindən artıq duru olarsa, daha çox peçenye əlavə etmək olar.
Hazır şirniyyatları zövqə uyğun olaraq kakao, kokos yonqarı, küncüt və ya doğranmış qozun içində yuvarlayın. Şirniyyatı dərhal yemək olar, yaxud daha yaxşı dad alması üçün bir neçə saat soyuducuda saxlamaq mümkündür.
Deserti soyudulmuş halda təqdim etmək və soyuducuda üç gündən çox saxlamamaq tövsiyə olunur.
İstəyə görə içərisinə giləmeyvə, banan, quru gavalı və ya bütöv qoz əlavə edərək "sürprizli" şirniyyat hazırlamaq olar. Böyüklər üçün isə xəmirə yarım çay qaşığı rom və ya digər ətirli spirtli içki əlavə etmək mümkündür.
Jalə
