Yuxu zamanı bədənin hansı vəziyyətdə olması ilə bağlı müxtəlif fikirlər var. Ən çox yayılan iddialardan biri isə ən yaxşı yuxu pozasının sol böyrü üstə yatmaq olmasıdır. Lakin həkimlərin fikrincə, hər kəs üçün keçərli olan vahid “ideal” poza yoxdur.
Demokrat.az xəbər verir ki, britaniyalı həkim Niş Manekin sözlərinə görə, sol böyrü üstə yatmaq xüsusilə mədə yanması və turşu reflüsündən əziyyət çəkən insanlar üçün faydalı ola bilər. Bu vəziyyətdə mədə turşusunun qida borusuna geri qayıtması daha az ehtimal olunur.
Bununla belə, sol tərəfdə yatmağın həzmi avtomatik olaraq yaxşılaşdırdığı fikri doğru deyil. İnsan yatarkən də qida normal şəkildə həzm olunur və bədənin vəziyyəti bu prosesi dayandırmır.
Arxa üstə yatmaq
Arxa üstə yatmaq bəzi insanlar üçün boyun və bel nahiyəsinə düşən yükü azaltmağa kömək edə bilər. Bədənin çəkisi daha bərabər paylanır və düzgün seçilmiş yastıqla onurğa təbii vəziyyətdə qala bilər.
Lakin xoruldama və yuxu apnesi olan insanlarda bu vəziyyət problemi ağırlaşdıra bilər. Çünki arxa üstə uzandıqda dil geriyə doğru hərəkət edərək tənəffüs yollarını qismən bağlaya bilər.
Böyrü üstə yatmağın üstünlükləri
Böyrü üstə yatmaq bir çox insan üçün rahat olmaqla yanaşı, xoruldama və yuxu apnesinin azalmasına da kömək edə bilər. Bel və ya çanaq nahiyəsində ağrı olduqda isə dizlərin arasına yastıq qoymaq beldəki gərginliyi azaltmağa və bədəni daha düzgün vəziyyətdə saxlamağa kömək edə bilər.
Hamiləlik zamanı hansı tərəfdə yatmalı?
Hamilə qadınlara çox vaxt sol böyrü üstə yatmaq tövsiyə edilir. Bunun qan dövranını yaxşılaşdıra və qaraciyərə düşən təzyiqi azalda biləcəyi düşünülür. Bununla belə, sağ böyrü üstə yatmaq da adətən təhlükəsiz hesab olunur. Buna görə narahatlıq yaradırsa, bütün gecəni yalnız sol tərəfdə yatmağa məcbur olmaq lazım deyil.
Mütəxəssislər bildirirlər ki, konkret sağlamlıq problemi olmayan insanlar üçün əsas meyar yatarkən rahatlıq, bədənin və onurğanın düzgün dəstəklənməsi və kifayət qədər keyfiyyətli yuxu almaqdır.
Jalə Demokrat.az
