Kondisionerin mütəmadi təmizlənməsi onun daha səmərəli işləməsinə, elektrik sərfiyyatının azalmasına və havaya yayılan toz və çirkləndiricilərin qarşısının alınmasına kömək edir. Xüsusilə uzun müddət işlədilməyən kondisioneri təmizləmədən işə salmaq məsləhət görülmür.
Demokrat.az xəbər verir ki, bu barədə Infobae.com saytı yazıb.
Mütəxəssislərin fikrincə, kondisionerə gündəlik qulluq işlərinin bir hissəsini evdə həyata keçirmək mümkündür. Lakin mürəkkəb texniki problemlər zamanı mütləq mütəxəssisə müraciət edilməlidir.
Filtrləri necə təmizləmək lazımdır?
Kondisionerin ön qapağını açaraq filtrləri çıxarmaq və üzərindəki tozu tozsoranla təmizləmək lazımdır. Əgər filtrlərdə daha ciddi çirklənmə varsa, onları soyuq su və antibakterial sabunla yumaq olar.
Filtrləri yumaq üçün isti sudan istifadə etmək məsləhət görülmür. Çünki yüksək temperatur filtr materialının formasını poza bilər. Yuyulduqdan sonra filtrlər tamamilə qurumalı və yalnız bundan sonra kondisionerə yerləşdirilməlidir.
Daxili blok da təmizlənməlidir
Yalnız filtrlərin təmizlənməsi kifayət etmir. Filtrlər çıxarıldıqdan sonra kondisionerin daxili hissəsi və hava çıxış barmaqlıqları da diqqətlə silinməlidir.
Bunun üçün su və sabunla nəmləndirilmiş yumşaq parçadan istifadə etmək mümkündür. Təmizlədikdən sonra bütün səthlərin yaxşı qurudulması vacibdir. Bu, kif və xoşagəlməz qoxuların yaranması riskini azaltmağa kömək edir.
Belə təmizliyin ildə ən azı iki dəfə aparılması, həmçinin hava axınının zəiflədiyi və ya kondisionerdən qeyri-adi qoxu gəldiyi zaman təkrarlanması tövsiyə olunur.
Xarici blok və drenaj borusunu unutmayın
Kondisionerin xarici bloku da vizual olaraq yoxlanılmalıdır. Hava girişlərinin yarpaq, toz və digər çirklərlə tutulmadığından əmin olmaq lazımdır. İmkan olduqda istilik dəyişdiricisini yumşaq fırça və ya sıxılmış hava ilə ehtiyatla təmizləmək olar.
Drenaj borusunun tutulmaması da vacibdir. Boruda tıxanma yarandıqda kondisionerin daxili hissəsində su toplana, nəticədə su sızması və xoşagəlməz qoxu yarana bilər.
Hansı hallarda ustaya müraciət edilməlidir?
Filtrlərin və daxili blokun sadə təmizliyini istifadəçi özü həyata keçirə bilər. Bununla belə, kondisioner təmizləndikdən sonra da kifayət qədər soyutmursa və ya nasazlıq davam edirsə, peşəkar mütəxəssis çağırmaq lazımdır.
Elektrik dövrələrinin yoxlanılması, soyuducu qazın doldurulması və daxili komponentlərin təmiri kimi işlər mütəxəssis tərəfindən görülməlidir.
Jalə Demokrat.az
