Amerikalı profilaktik kardioloq Dara Li Lyuis ürək sağlamlığını qorumaq istəyənlərin evdə hansı qidaları saxlamağına diqqət etməli olduğunu açıqlayıb.
Demokrat.az xəbər verir ki, həkimin sözlərinə görə, o, məşğul həyat tərzinə görə evdə tez hazırlanan və faydalı məhsullar saxlamağa üstünlük verir. Onun dondurucusunda adətən krevetka, toyuq filesi, dondurulmuş giləmeyvələr və ispanaq olur.
Kardioloq həmçinin evdə təzə və ya dondurulmuş tərəvəzlər, salat göyərtiləri, kəsmik, təbii yoqurt, tofu, lobya, qoz-fındıq və toxumlar saxlayır. Bu məhsulların bir çoxu lif, zülal və digər faydalı qida maddələri ilə zəngindir.
Kardioloqun evdə saxlamadığı məhsul
Lakin Lyuisin dondurucusunda heç vaxt saxlamadığı bir məhsul var: dondurma.
Həkim dondurmanı sevdiyini etiraf etsə də, onun tərkibində doymuş yağların və şəkərin yüksək ola biləcəyini vurğulayıb. Doymuş yağların həddindən artıq qəbulu qanda LDL (“pis”) xolesterinin səviyyəsini yüksəldə və ürək-damar xəstəlikləri riskini artıra bilər.
Bundan əlavə, yüksək şəkər və kalori miqdarı müntəzəm və həddindən artıq istehlak edildikdə çəki artımına səbəb ola bilər.
Dondurmadan tam imtina etmək lazımdırmı?
Kardioloq dondurmanı tamamilə qadağan etmir. Onun tövsiyəsi ölçülü istifadədir.
Lyuis dondurmanı evdə hər axşam yemək əvəzinə, onu ara-sıra xüsusi desert kimi qəbul etməyi məsləhət görür. Məsələn, yaxınlarla kafedə yeyilən dondurma gündəlik vərdişə çevrilmədiyi üçün daha münasib seçim ola bilər.
Həkim vurğulayıb ki, ürək üçün sağlam qidalanmaq sevilən qidalardan tamamilə imtina etmək demək deyil. Əsas məsələ yüksək şəkər və doymuş yağlarla zəngin məhsulların tez-tez və həddindən artıq qəbul edilməməsidir.
Jalə Demokrat.az
