Payızın yaxınlaşması ilə kulinariya həvəskarları qış mövsümü üçün konservlər hazırlamağa başlayırlar. Ən dadlı hazırlıqlardan biri isə universal tərəvəz salatıdır.
Demokrat.az xarici mediaya istinadən xəbər verir ki, bu resept yayda yetişən ən dadlı tərəvəzləri bir bankada birləşdirməyə imkan verir. Belə qəlyanaltı ət, balıq, kartof və ümumiyyətlə istənilən duzlu yeməyin yanında ideal seçimdir. Hazırlanan salat qısa müddətdə tükənir, qohum və qonşularınız isə resepti sizdən istəyəcəklər.
Sterilizasiya tələb etməyən “Assorti” qış salatı
Bu reseptin üstünlüyü ondan ibarətdir ki, bankaları əvvəlcədən sterilizasiya etməyə ehtiyac yoxdur. Onları yuyucu vasitə ilə yaxşıca yumaq kifayətdir.
Təklif olunan reseptdə xiyar və pomidorla yanaşı, soğan və şirin bibərdən də istifadə olunur. Bununla belə, qəlyanaltının tərkibi yalnız sizin zövqünüzdən asılıdır. Salata kabaçki, kök, kələm və digər tərəvəzlər də əlavə etmək mümkündür.
Hazırlamaq üçün aşağıdakı ərzaqlar tələb olunur:
* 1 kq xiyar; * 700 q pomidor; * 3 böyük bolqar bibəri; * 2 iri soğan; * 1 baş sarımsaq; * 1 xörək qaşığı duz; * 3 xörək qaşığı şəkər; * 4 xörək qaşığı günəbaxan yağı; * 1 xörək qaşığı sirkə; * 1 dəstə göyərti; * 2 dəfnə yarpağı; * zövqə görə ədviyyatlar.
Göstərilən miqdarda ərzaq təxminən 0,5 litrlik 4 bankaya kifayət edir.
Bütün tərəvəzləri axar suyun altında yaxşıca yuyun. Bibərlərin toxumlarını və iç hissəsini təmizləyin. Salat böyük qazanda bişiriləcək. Doğranmış pomidorları, yarımhalqa şəklində doğranmış soğanı və zolaq formasında kəsilmiş bibərləri qazana qoyun. Duz, şəkər, dəfnə yarpağı və zövqə uyğun ədviyyatlar əlavə edin. Ətirli istiot və keşnişdən istifadə etmək olar.
Qazanı ocağın üzərinə qoyun və qarışıq qaynadıqdan sonra zəif odda təxminən 20 dəqiqə bişirin.
Xiyarları halqa formasında, sarımsağı isə nazik dilimlər şəklində doğrayın. Göyərtini xırdalayın. Daha sonra bunları qazana əlavə edin, bitki yağı və sirkəni tökün. Daha 15 dəqiqə bişirin.
Hazır tərəvəz salatını təmiz bankalara doldurun. Sonra bankaları dibinə dəsmal sərilmiş geniş qazana yerləşdirin. Bankaların çiyin hissəsinə qədər su tökün və zəif odda 15 dəqiqə saxlayın.
Bankaların qapaqlarını möhkəm bağlayın və uzunmüddətli saxlamaq üçün uyğun yerə yerləşdirin.
Jalə Demokrat.az
