Bəzi geniş istifadə olunan dərmanlar düzgün qəbul edilmədikdə qaraciyəri zədələyə bilər. Bunlara, xüsusilə, parasetamol, qeyri-steroid iltihabəleyhinə preparatlar və antibiotiklər daxildir.
Demokrat.az xəbər verir ki, bu barədə terapevt Aleksandra Vışnyakova gazeta.ru-ya bildirib.
Dərmanların dozasını özbaşına artırmaq, tərkibində eyni təsiredici maddə olan bir neçə preparatı birlikdə qəbul etmək və ya onları tövsiyə olunan müddətdən daha uzun müddət istifadə etmək xüsusilə təhlükəlidir. Bununla belə, dərman mənşəli qaraciyər zədələnməsi hər insanda baş vermir, lakin bəzi hallarda ağır nəticələrə səbəb ola bilər.
Həkimin sözlərinə görə, doza həddinin aşılması zamanı qaraciyərin toksik zədələnməsinə səbəb ola bilən ən məşhur preparatlardan biri parasetamoldur.
"Tövsiyə olunan dozalarda parasetamol əksər insanlar üçün adətən təhlükəsizdir. Lakin icazə verilən miqdarın aşılması ciddi fəsadlara gətirib çıxara bilər. Əlavə problem ondan ibarətdir ki, parasetamol soyuqdəymə və ağrıya qarşı bir çox kombinə edilmiş preparatın tərkibinə daxildir. Eyni vaxtda bir neçə dərman qəbul edildikdə, onun dozasını fərqinə varmadan aşmaq asandır", deyə Vışnyakova izah edib.
Terapevt parasetamolun alkoqolla birlikdə qəbulunun da təhlükəli ola biləcəyi barədə xəbərdarlıq edib. Qaraciyər xəstəlikləri, qeyri-kafi qidalanma və bəzi digər vəziyyətlər zamanı risk daha yüksəkdir. Buna görə ağrıkəsicinin dozasını özbaşına artırmaq və ya alkoqol qəbulunun nəticələrinin qarşısını almaq məqsədilə parasetamol qəbul etmək olmaz.
Vışnyakova bəzi qeyri-steroid iltihabəleyhinə preparatların da qaraciyərə zərər verə biləcəyini qeyd edib. Bunlara diklofenak, nimesulid və digər təsiredici maddələr əsasında hazırlanan bəzi preparatlar daxildir. Belə fəsadlara daha az rast gəlinir, lakin dərmanların uzun müddət və nəzarətsiz istifadəsi zamanı arzuolunmaz reaksiyaların yaranma ehtimalı artır.
Terapevtin sözlərinə görə, bəzi antibiotiklər də ayrıca risk qrupuna daxildir. Buna görə soyuqdəymə, qrip və digər xəstəliklər zamanı antibiotikləri özbaşına qəbul etməyə başlamaq olmaz.
Həkimin fikrincə, daha bir geniş yayılmış səhv tərkibi yoxlamadan bir neçə preparatı eyni vaxtda qəbul etməkdir. Buna görə kombinə edilmiş dərmanlardan istifadə etməzdən əvvəl onların tərkibindəki təsiredici maddələri yoxlamaq və tövsiyə olunan dozaları aşmamaq vacibdir.
Mütəxəssis diqqətə çatdırıb ki, dərman mənşəli qaraciyər zədələnməsi hər zaman dərhal nəzərəçarpan simptomlarla müşayiət olunmur. Sonradan halsızlıq, ürəkbulanma, iştahanın azalması, sağ qabırğaaltı nahiyədə narahatlıq, sidiyin tündləşməsi, dəridə qaşınma və ya dərinin, gözlərin ağının saralması kimi əlamətlər yarana bilər. Belə simptomlar müşahidə edildikdə həkimə müraciət etmək lazımdır.
Jalə Demokrat.az
