Çia toxumu və yulaf yüksək qida dəyərinə malik olmaqla yanaşı, bağırsaq sağlamlığına müsbət təsir göstərə bilən məhsullar hesab olunur. Hər ikisi liflə zəngindir, lakin həzm sisteminə təsir mexanizmləri fərqlənir.
Demokrat.az xəbər verir ki, bu barədə "Eating well" yazır.
Çia toxumu bağırsağa necə təsir edir?
Dietoloqların fikrincə, çia toxumunun əsas üstünlüklərindən biri onun yüksək miqdarda lif ehtiva etməsidir. İki xörək qaşığı çia toxumunda təxminən 10 qram lif olur. Bu isə böyüklər üçün tövsiyə olunan gündəlik 25-38 qramlıq lif normasının əhəmiyyətli hissəsini təmin edir.
Çia həm həll olunan, həm də həll olunmayan liflə zəngindir. Toxum su ilə təmasda olduqda geləbənzər maddə əmələ gətirir. Bu xüsusiyyət bağırsaq möhtəviyyatının həcmini artıraraq həzm sistemindən daha rahat keçməsinə kömək edə və qəbizliyin qarşısını almağa dəstək ola bilər.
Həll olunan lif həmçinin bağırsaqdakı faydalı bakteriyalar üçün qida rolunu oynayır. Çia toxumu bununla yanaşı, bitki mənşəli omeqa-3 yağ turşusu olan alfa-linolen turşusu (ALA), antioksidantlar və müxtəlif polifenollarla zəngindir.
Yulafın üstünlüyü nədir?
Yulafın bağırsaq üçün əsas faydalı komponentlərindən biri beta-qlükan adlı lifdir. Bu maddə prebiyotik xüsusiyyət daşıyır və bağırsaqdakı faydalı mikroorqanizmlərin fəaliyyətini dəstəkləyə bilər.
Bağırsaq bakteriyaları beta-qlükanı fermentləşdirdikdə asetat, propionat və butirat kimi qısa zəncirli yağ turşuları əmələ gəlir. Xüsusilə butirat yoğun bağırsağı örtən hüceyrələr üçün mühüm enerji mənbəyidir. Bu maddələr bağırsaq baryerinin möhkəmlənməsinə və iltihabın azalmasına kömək edə bilər.
Yulafın tərkibində antioksidant xüsusiyyətlərə malik avenantramidlər, E vitamini və bitki sterolları da var. Araşdırmalar yulaf qəbulunun Lactobacillus və Bifidobacterium kimi faydalı bakteriyaların sayının artması ilə əlaqəli ola biləcəyini göstərib.
Bəs hansı daha yaxşıdır?
Mütəxəssislərin fikrincə, çia toxumu və yulafdan birini digərindən üstün hesab etməkdənsə, hər ikisini qidalanmaya daxil etmək daha faydalıdır. Çia yüksək miqdarda lif və omeqa-3 təmin edir, yulaf isə beta-qlükan və bağırsaq bakteriyalarının istehsal etdiyi faydalı metabolitlərlə seçilir.
Bu məhsulların hər ikisi balanslı qidalanmanın bir hissəsi kimi həzm sisteminin normal fəaliyyətini və bağırsaq mikrobiotasını dəstəkləyə bilər.
Jalə Demokrat.az
