Orqanizm ciddi problem yaranmazdan xeyli əvvəl bununla bağlı siqnallar verməyə başlayır. Buna görə də heç bir əsaslı səbəb olmadan özünüzü pis hiss edirsinizsə, bunun orqanizmdə hər hansı elementin, məsələn, dəmirin çatışmazlığı ilə əlaqəli olmadığından əmin olmaq lazımdır.
Demokrat.az cəbər verir ki, orqanizmdə dəmir çatışmazlığını necə müəyyən etmək və ilk növbədə hansı simptomlara diqqət yetirmək lazım olduğu barədə həkimlər "Cleveland Clinic" nəşrində məlumat veriblər.
Dəmir çatışmazlığı – simptomlar və ilk əlamətlər
Dəmir orqanizmin fəaliyyətində mühüm rol oynayır. O, oksigeni bütün orqan və toxumalara daşıyan zülal – hemoqlobinin yaranmasında iştirak edir. Dəmir ehtiyatları tədricən tükəndikdə hüceyrələr oksigen çatışmazlığı yaşamağa başlayır və insanın ümumi vəziyyəti nəzərəçarpacaq dərəcədə pisləşir.
İlk həyəcanverici əlamətlərdən biri üzün, dodaqların və ya göz qapaqlarının daxili səthinin qeyri-adi solğunlaşması ola bilər. Bəzi insanlarda dəri yüngül sarımtıl rəng də ala bilər.
Orqanizmdə dəmir çatışmazlığını necə anlamaq barədə düşünürsünüzsə, davamlı yorğunluğu da nəzərdən qaçırmaq olmaz. "Jama" jurnalında dərc olunan tədqiqatların icmalına görə, tam yuxudan sonra belə gümrahlıq hissi yaranmırsa və adi işlər daha çox güc tələb edirsə, mümkün dəmir çatışmazlığı barədə düşünmək lazımdır.
Digər geniş yayılmış simptom nəfəs darlığıdır. Pilləkənlərlə qalxmaq, sürətli yerimək və ya digər adi fiziki fəaliyyətlər zamanı qəfildən nəfəs çatışmazlığı yarana bilər. Bunun səbəbi orqanizmin toxumaları oksigenlə təmin etməkdə çətinlik çəkməsidir.
Dəmir çatışmazlığını necə anlamaq olar? - Digər əlamətlər
Bununla belə, bu əlamətlərin hər birinin ayrı-ayrılıqda müxtəlif səbəbləri ola biləcəyini nəzərə almaq vacibdir. Lakin bir neçə simptomun eyni vaxtda müşahidə olunması həkimə müraciət etmək və müayinədən keçmək üçün ciddi səbəbdir.
Məsələn, orqanizmdə dəmir çatışmadıqda əlamətlər ətraf mühitin temperaturuna həssaslıq şəklində özünü göstərə bilər: insanlar daim üşüməyə başlayır, xüsusilə də əllərin və ayaqların soyuq olmasından şikayətlənirlər. "Taylor & Francis" jurnalında dərc olunan araşdırmaya görə, bunun səbəbi orqanizmin daha az oksigen alması və normal qan dövranını daha çətin təmin etməsidir.
Bəzən olduqca qeyri-adi istəklər də yaranır. Məsələn, buz gəmirmək və ya təbaşir, torpaq kimi yeyilməyən maddələri yemək istəyi meydana çıxa bilər. Bu simptom nadir hallarda müşahidə olunsa da, həkimlər uzun müddətdir ki, onu ciddi dəmir çatışmazlığı ilə əlaqələndirirlər.
Nəhayət, orqanizmdə dəmir çatışmazlığını anlamağın ən göstərici üsullarından biri dırnaqlara diqqət yetirməkdir. Zaman keçdikcə onlar daha kövrək və yumşaq olur, bəzən isə qaşığa bənzəyən xarakterik çökük forma alır.
Bundan əlavə, bəzi insanlarda, xüsusilə qadınlarda saç tökülməsi artır. "JAAD" jurnalında dərc olunan araşdırmada bunun dəmir çatışmazlığı zamanı orqanizmin resursları ilk növbədə həyati vacib funksiyaların qorunmasına yönəltməsi ilə izah olunur. Buna görə saçların böyüməsi müvəqqəti olaraq ikinci plana keçir.
Ümumilikdə, bu simptomlar davam edirsə və ya tədricən güclənirsə, həkimə müraciəti təxirə salmamaq daha yaxşıdır. Orqanizmdə dəmir çatışmazlığından şübhələnirsinizsə, qan analizi problemin miqyasını müəyyənləşdirməyə və səbəbini aydınlaşdırmağa kömək edəcək.
Jalə Demokrat.az
