Eurovision Mahnı Müsabiqəsinin qaydaları dəyişdirilib. Silahlı münaqişələrin və ya ciddi geosiyasi gərginliklərin təhlükəsizliyi təhdid etdiyi ölkələr müsabiqədə qalib gəlsələr belə, növbəti yarışmaya ev sahibliyi edə bilməyəcək.
Demokrat.az xəbər verir ki, Avropa Yayım Birliyinin (EBU) 2027-ci il Eurovision müsabiqəsindən əvvəl açıqladığı yeni qaydalara əsasən, qalib ölkənin və ya onun yaxın ətrafının təhlükəsizliyinə və sabitliyinə ciddi təsir göstərən vəziyyətlərdə ev sahibliyi hüququ avtomatik olaraq həmin ölkəyə verilməyəcək.
EBU zəruri hesab etdiyi halda qalib ölkə ilə bağlı müstəqil təhlükəsizlik qiymətləndirməsi həyata keçirəcək. Tədbirin təhlükəsiz şəkildə keçirilməsinin mümkün olmadığı qənaətinə gəlinərsə, müsabiqə üçün başqa yayımçı qurum seçiləcək. Alternativ yayımçı tədbiri qalib ölkənin adından deyil, birbaşa öz adından təşkil edəcək.
Yeni qayda 2022-ci ildə Eurovision-da qalib gələn Ukraynanın müharibə səbəbindən müsabiqəyə ev sahibliyi edə bilməməsindən sonra tətbiq olunan üsulu rəsmiləşdirir.
EBU Rusiyanın işğalı səbəbindən təhlükəsizlik şəraitinin uyğun olmadığına qərar vermiş və 2023-cü il Eurovision müsabiqəsi Ukrayna əvəzinə İngiltərənin Liverpul şəhərində keçirilmişdi.
Yeni qayda yalnız birbaşa müharibədə iştirak edən ölkələrə deyil, ciddi geosiyasi gərginliklərin təhlükəsizliyə təsir etdiyi ölkələrə də şamil olunacaq.
Yeni qayda İsrailin Eurovision-da iştirakı ilə bağlı mübahisələrin yaşandığı bir dövrdə açıqlanıb. İspaniya, Niderland, İrlandiya, İslandiya və Sloveniya Qəzzadakı müharibəyə görə İsrailin müsabiqədə iştirakına etiraz edərək 2026-cı il Eurovision-da yer almayıb.
İsraili təmsil edən Noam Bettan isə etirazların kölgəsində keçirilən müsabiqəni ikinci pillədə başa vurub. Bununla belə, yeni qaydalar müharibə aparan ölkələrin müsabiqədə iştirakını qadağan etmir. Yalnız təhlükəsizlik şəraiti uyğun hesab edilmədiyi halda həmin ölkələrin ev sahibliyi etməsinin qarşısını alır.
Eurovision rəhbərliyi iştirakçılar üçün tətbiq olunan yaş həddini də dəyişib. Əvvəllər 16 yaş olan minimum iştirak yaşı 2027-ci ildən etibarən 18-ə qaldırılacaq.
Əsas vokal ifaçısının əsas melodiyanı canlı səsləndirməsi məcburi olacaq. Əvvəlcədən yazılmış vokallardan və musiqi müşayiətindən istifadə etmək mümkün olacaq, lakin onların əsas vokalı əvəz etməsinə və ya ifaçıya həddindən artıq dəstək verməsinə icazə verilməyəcək.
2026-cı il Eurovision müsabiqəsini müğənni Dara ilə qazanan Bolqarıstan 2027-ci ildə keçiriləcək yarışmaya ev sahibliyi edəcək.
Jalə Demokrat.az
