Gənc yaşlarında Londona köçərək şəhərin imkanlı və nüfuzlu çevrələrinə daxil olan Anna Çapmanın illər sonra Rusiyanın ABŞ-da fəaliyyət göstərən “dərin örtüklü” casuslarından biri olduğu üzə çıxıb. Onun casusluq fəaliyyətindən sonra Rusiyada qazandığı yeni statusu isə diqqət çəkib.
Demokrat.az xəbər verir ki, əsl adı Anna Vasilyevna Kuşşenko olan Çapman 2001-ci ilin avqustunda 20 yaşında tələbə kimi İngiltərəyə gedib. Qısa müddət ərzində sosial əlaqələri və xarici görünüşü ilə Londonun imkanlı dairələrində tanınmağa başlayıb.
Londonun nüfuzlu çevrələrinə necə daxil oldu?
Çapman Londonda müxtəlif iş adamları və yüksək sosial statusa malik şəxslərlə əlaqələr qurub. Onun tanışlarından biri olan maliyyəçi Nikolas Kamilleri Çapmanı ağıllı, ünsiyyətcil və insanları diqqətlə dinləyən biri kimi xarakterizə edib.
Həmin dövrdə İngiltərənin böyük banklarından birində kassir işləyən Çapman daha maraqlı iş axtardığını bildirib. Bundan sonra Kamilleri onu şəxsi köməkçisi kimi işə götürüb.
Çapmanın işgüzar görüşlərdə və gecə klublarında insanlarla asanlıqla ünsiyyət qurduğu qeyd olunur. Zaman keçdikcə onun sosial dairəsi Rusiyanın nüfuzlu şəxslərinə qədər genişlənib.
Putinin rəqibi ilə də əlaqəsi olub
Çapmanın Londonda tanış olduğu şəxslər arasında Rusiyanın ən varlı iş adamlarından biri və Vladimir Putinin tanınmış siyasi rəqiblərindən Boris Berezovski də olub.
Maliyyəçi Kamillerinin sözlərinə görə, Berezovski Çapmanla tanış olduqdan sonra onu tez-tez nahara dəvət edib. Buna baxmayaraq, Çapman şəxsi həyatı barədə ətrafındakılara çox məlumat verməyib.
ABŞ-da FTB-ın diqqətinə düşdü
2010-cu ildə ABŞ-a köçən Çapmanın həyatı tamamilə dəyişib. Federal Təhqiqatlar Bürosu (FTB) Nyu-Yorkda daşınmaz əmlak biznesi ilə məşğul olduğu görüntüsü yaradan qadını izləməyə başlayıb.
Əməliyyata rəhbərlik edən federal agent Ed Foli bildirib ki, Çapman gündüzlər adi həyat tərzi keçirir, alış-veriş edir və yoqa ilə məşğul olurdu. Lakin gecələr bahalı avtomobillərlə VIP klublara gedir və maliyyə və siyasi çevrələrdən olan şəxslərlə görüşürdü.
FTB-ın araşdırması nəticəsində onun ABŞ-da adi vətəndaş kimi yaşayan 10 “dərin örtüklü” Rusiya agentindən biri olduğu müəyyənləşdirilib.
Tarixi casus mübadiləsi ilə Rusiyaya qayıtdı
Çapman və digər doqquz agent eyni vaxtda ABŞ-da saxlanılıb. Daha sonra ABŞ 10 Rusiya agentini Moskvaya göndərib, Rusiya isə Qərb ölkələrinin xeyrinə casusluqda ittiham edilərək həbs olunan dörd yüksək səviyyəli şəxsi azad edib.
Azad edilən şəxslər arasında sonradan İngiltərədə yaşayan keçmiş Rusiya kəşfiyyatçısı Sergey Skripal da olub.
Rusiyaya qayıtdıqdan sonra Çapman ölkəsində məşhur simaya çevrilib. O, Vladimir Putin tərəfindən qəbul edilib, müxtəlif televiziya proqramlarında iştirak edib və Rusiyanın “Maxim” jurnalının üz qabığında silahla fotosessiyaya çəkilib.
Keçmiş çevrəsindən bəzi şəxslər şübhəli şəkildə öldü
Çapmanın həyat hekayəsi Rusiyanın Qərbdəki müxalifləri və keçmiş kəşfiyyat əməkdaşlarının müəmmalı ölümləri ilə bağlı müzakirələrlə də kəsişib.
Rusiyadan Böyük Britaniyaya köçən keçmiş kəşfiyyat əməkdaşı Aleksandr Litvinenko 2006-cı ildə polonium-210 maddəsi ilə zəhərlənərək ölüb. Çapmanın Londonda tanış olduğu Boris Berezovski isə 2013-cü ildə Ascotdakı evinin hamamında boynunda izlərlə ölü tapılıb.
Hər iki ölüm uzun illər müxtəlif araşdırmaların və fərziyyələrin mövzusu olub. Çapmanın keçmiş həyat yoldaşı Aleks Çapman da 2015-ci ildə həddindən artıq dozada narkotik qəbulundan vəfat edib.
İndi Rusiya Kəşfiyyat Muzeyinə rəhbərlik edir
Casusluq fəaliyyəti üzə çıxdıqdan sonra Anna Çapman Rusiyada ictimaiyyət tərəfindən tanınan simalardan birinə çevrilib. O, müxtəlif dövrlərdə qidalanma üzrə kouç kimi fəaliyyət göstərib, öz geyim brendini yaradıb və xatirələrini bədii elementlərlə birləşdirdiyi kitab yazıb.
Çapmanın sonrakı fəaliyyəti də diqqət çəkib. O, ötən il Rusiya Kəşfiyyat Muzeyinin rəhbəri vəzifəsinə təyin edilib.
Jalə Demokrat.az
