Vaxt keçdikcə sudakı minerallar duş başlığının dəliklərində toplanaraq su təzyiqinin azalmasına və axının qeyri-bərabər olmasına səbəb olur. Bir çox insan təmizləmə üçün soda və ya sirkədən istifadə etsə də, "Cronista" nəşrinin yazdığına görə, limon turşusu daha effektiv vasitələrdən biri hesab olunur.
Demokrat.az xəbər verir ki, limon turşusu əhəng çöküntüsünü həll etməyə kömək edir, su axınının bərpasını təmin edir və duş başlığının istifadə müddətini uzada bilər. Bu məhsulu təsərrüfat malları və təmizlik vasitələri satılan mağazalardan əldə etmək mümkündür.
Duş başlığını necə təmizləmək olar?
Bunun üçün iki-üç xörək qaşığı limon turşusunu ilıq su ilə qarışdırmaq lazımdır.
Əgər duş başlığını çıxarmaq mümkündürsə, onu hazırlanan məhlulun içində 30–60 dəqiqə saxlamaq tövsiyə olunur. Daha sonra çətin çıxan çöküntüləri köhnə diş fırçası ilə təmizləmək və duş başlığını bol su ilə yuyaraq yenidən yerinə quraşdırmaq lazımdır.
Əgər duş başlığını çıxarmaq mümkün deyilsə, məhlulu paketə tökərək onu duş başlığının ətrafına elə bağlamaq olar ki, su çıxan dəliklər tamamilə məhlulun içində qalsın.
Əhəng çöküntüsü niyə yaranır?
Əhəng çöküntüsünün əmələ gəlməsi suyun sərtliyindən asılıdır. Suda kalsium və maqneziumun miqdarı nə qədər çox olarsa, borular və duş başlığının dəlikləri bir o qədər tez tutulur.
Bunun qarşısını almaq üçün mütəxəssislər aşağıdakı tədbirləri tövsiyə edirlər:
* Duş başlığını ayda ən azı bir dəfə təmizləmək; * Hər istifadədən sonra səthləri quru parça ilə silmək; * Dəlikləri vaxtaşırı yoxlayaraq tutulmaları aradan qaldırmaq; * Suyun sərt olduğu ərazilərdə əhəng əleyhinə filtr və ya suyumşaldıcı sistemlərdən istifadə etmək.
Mütəxəssislərin sözlərinə görə, müntəzəm profilaktik təmizlik güclü çöküntülərin yaranmasının qarşısını alır və su təzyiqinin uzun müddət normal qalmasına kömək edir. Duş başlığının düzgün işləməsi üçün sadə, lakin davamlı qulluq kifayət edir.
Jalə Demokrat.az
