Bir çox insanın yaddaşında SSRİ dövründə mağazalarda və yeməkxanalarda satılan QOST standartına uyğun balqabaq kürüsünün dadı qalıb. Sadə görünən bu qəlyanaltının xüsusi dadını ev şəraitində də əldə etməyə çalışan çoxsaylı evdar qadınlar olub.
Demokrat.az xəbər verir ki, 1967-ci ilin QOST standartına uyğun hazırlanan balqabaq kürüsünün əsas sirri nadir məhsullarda və ya xüsusi ədviyyatlarda deyil, dəqiq ölçülərlə hazırlanmış, sınaqdan keçirilmiş reseptdə idi.
Müasir reseptlərdə tez-tez unudulan əsas əlavələrdən biri isə ağ kök tərəvəzləri – cəfəri kökü, kərəviz kökü və pastərnak idi. Məhz bu məhsulların birləşməsi qəlyanaltıya yüngül, göbələyə bənzər xüsusi ətir və tanınan dad verirdi.
Lazım olan ərzaqlar:
* balqabaq – 1,5 kq (3–4 orta ölçülü balqabaq); * kök – 100 qram; * soğan – 80 qram; * pastərnak, cəfəri və kərəviz kökləri – hərəsindən 15 qram; * cəfəri, şüyüd və kərəviz göyərtisi – hərəsindən bir kiçik dəstə; * tomat pastası (30 faizli) – 80 qram; * bitki yağı – 100 ml; * duz – 15 qram (təxminən 1 xörək qaşığı); * şəkər – 7 qram (təxminən 2 çay qaşığı); * üyüdülmüş qara və ətirli istiot qarışığı – 1 qram.
Əgər bütün ağ kökləri tapmaq mümkün deyilsə, reseptdən imtina etməyə ehtiyac yoxdur. Bu məhsullar əsasən ətir vermək üçün istifadə olunurdu və onların olmaması yeməyin dadına ciddi təsir göstərməyəcək. Eyni qayda istiot qarışığına da aiddir – adi qara üyüdülmüş istiotdan istifadə etmək olar.
Sovet üsulu ilə balqabaq kürüsünün hazırlanması
Əvvəlcə bütün tərəvəzləri təmizləyib xırda doğramaq lazımdır. Kök iri sürtgəcdən keçirilə, ağ köklər isə xırda sürtgəcdən keçirilə və ya bıçaqla çox incə doğrana bilər. Göyərtini isə ətirini qorumaq üçün qazana əlavə etməzdən az əvvəl doğramaq məsləhətdir.
Daha sonra tavada bitki yağını qızdırıb tərəvəzləri qovurmaq lazımdır. Onları birlikdə və ya ayrı-ayrılıqda bişirmək olar. Tərəvəzlər yüngül qızardıqdan sonra yumşalana qədər bir qədər pörtlədilir, lakin şirəsinin tam buxarlanmaması üçün çox uzun müddət odda saxlamaq olmaz.
Tərəvəzlər yumşaldıqdan sonra blender və ya ətçəkən vasitəsilə vahid kütlə halına gətirilir. Daha iri hissəli balqabaq kürüsü sevənlər isə sadəcə əzicidən istifadə edə bilərlər.
Sonra qarışıq yenidən zəif odda qızdırılır, üzərinə tomat pastası, duz, şəkər, istiot və göyərti əlavə edilir. Bütün ərzaqlar yaxşı qarışdırılır və bir neçə dəqiqə bişirilir ki, dadlar bir-birinə qarışsın.
Qış üçün hazırlanacaq balqabaq kürüsünə sonda daha yaxşı saxlanması üçün bir qaşıq sirkə əlavə etmək tövsiyə olunur. Qarışıq daha 1–2 dəqiqə qaynadıldıqdan sonra oddan götürülür və təmiz bankalara doldurulur.
Qeyd etmək lazımdır ki, SSRİ-nin müxtəlif bölgələrində balqabaq kürüsünün hazırlanma üsulları fərqlənirdi. Məsələn, Qafqaz bölgələrində klassik reseptlərə tez-tez acı bibər də əlavə edilirdi. Lakin bu resept sovet konserv zavodlarının əksəriyyətində istifadə olunan texnologiyaya ən yaxın variantlardan biridir.
