Galeta içliyi görünən, dairəvi və açıq formada hazırlanan fransız piroqudur. Xarici görünüşünə görə pizzaya bənzəsə də, əsasən xırçıldayan xəmir əsasında hazırlanır.
Demokrat.az xəbər verir ki, bu yemək həm duzlu, həm də şirin ola bilər. Xüsusilə yay aylarında desert galetaları məşhurdur, çünki meyvə və giləmeyvələri təqdim etməyin dadlı üsullarından biridir.
Pendirli galeta çox zərif və ləzzətli alınır. Onun resepti uzun müddət xəmir yoğurmağı tələb etmir və minimum səylə hazırlamaq mümkündür. Bu bişinti o qədər iştahaçan olur ki, onu tez-tez hazırlamaqdan yorulmayacaqsınız.
Çiyələkli galeta necə hazırlanır?
Giləmeyvəli piroqun müəllif reseptini “Threads” sosial şəbəkəsində kulinariya bloqeri nelly.cooking paylaşıb. O, içlik üçün çiyələkdən istifadə edib, lakin eyni üsulla digər meyvə və giləmeyvələrlə də galeta hazırlamaq olar. Xüsusilə şaftalı, qaragilə, alma və əncirlə hazırlanan galeta da çox dadlı alınır.
Bir galeta üçün xəmirə lazım olan ərzaqlar:
* 180 qram kəsmik; * 150 qram un; * 1 yumurta; * 90 qram kərə yağı; * 1 xörək qaşığı şəkər; * bir çimdik vanil şəkəri; * bir çimdik duz; * 1 çay qaşığı qabartma tozu.
İçlik üçün:
* 400 qram çiyələk və ya digər meyvələr; * 90 qram kəsmik; * 1 yumurta; * 1 yumurta sarısı; * 1 xörək qaşığı şəkər; * 1 xörək qaşığı qarğıdalı nişastası.
Hazırlanma qaydası
Dərin qabda kəsmiyi yumurta, bir çimdik duz, adi və vanil şəkəri ilə qarışdırın. Kərə yağını mikrodalğalı sobada əridin və bir qədər soyudun. Daha sonra yağı un və qabartma tozu ilə birlikdə kəsmikli qarışığa əlavə edin. Yumşaq və eynicinsli xəmir alınmalıdır.
Xəmiri paketə büküb 30 dəqiqəlik dondurucuya yerləşdirmək məsləhətdir. Bu, çiyələkli galetanın daha yaxşı alınmasına kömək edəcək.
Sobanı 180 dərəcəyə qədər qızdırın. İçlik üçün kəsmik və yumurtanı eynicinsli kütlə alınana qədər qarışdırın. Çiyələkləri yuyub nazik dilimlərə doğrayın. Ayrı qabda şəkəri qarğıdalı nişastası ilə qarışdırın.
Xəmir kündəsini perqament kağızı sərilmiş soba listinə qoyun və böyük, nazik dairə formasında yayın. Ortasına nazik qatla kəsmikli içliyi yayın. Üzərinə şəkər-nişasta qarışığı səpin və çiyələk dilimlərini düzün.
Perqamentin köməyi ilə xəmirin kənarlarını yuxarı qaldıraraq içəriyə doğru bükün. Galetanın kənarlarını yumurta sarısı ilə yağlayın.
Çiyələkli pendirli galeta 180 dərəcə temperaturda təxminən 30–35 dəqiqə bişirilir. Bu bişinti həm isti, həm də soyudulmuş halda eyni dərəcədə dadlı olur.
