Şokoladlı brauni bütün dünyada tanınan, lakin yüksək kalorili desertlərdən biridir. Bu şirniyyat həm bahalı inqrediyentlər tələb edir, həm də yüksək kalorili olması səbəbindən çəkiyə təsir göstərə bilər. Lakin düzgün qidalanmaya üstünlük verən insanlar arasında da şirniyyat sevənlər var.
Demokrat.az xarici mediaya istinadən xəbər verir ki, buna görə aşpazlar məşhur desertlərin daha az kalorili alternativlərini hazırlamağa başlayıblar.
Brauni ənənəvi olaraq düzbucaqlı formada kəsilən, tünd qəhvəyi rəngli və sıx şokoladlı Amerika mənşəli desertdir. Adı ingilis dilində "qəhvəyi" (brown) mənasını verir. O, adətən əridilmiş şokolad və ya kakao, kərə yağı, şəkər, yumurta və az miqdarda un istifadə edilərək hazırlanır.
Belə reseptlərdən biri də pəhrizə uyğun kabaçki braunisidir. Bu desert hətta pəhriz zamanı da istifadə edilə bilən aşağı kalorili şirniyyat hesab olunur. Bişmiş məhsulun 100 qramında təxminən 120 kilokalori olur. Hazırlanması üçün nə kərə yağı, nə də şokolad tələb olunur.
Bu resept iki üstünlüyü birləşdirir: həm dadlı desertdən zövq almağa, həm də kabaçkidən faydalı şəkildə istifadə etməyə imkan verir. Hazır məhsulda tərəvəzin dadı hiss olunmur, buna görə kabaçkini sevməyən insanlar belə bu deserti bəyənə bilərlər.
Pəhriz kabaçki braunisi necə hazırlanır?
Kabaçki braunisini ilk kimin hazırladığı dəqiq məlum deyil. Resept sosial şəbəkələrdə sürətlə yayılıb və milyonlarla insanın marağına səbəb olub. Bu desert həm Ukraynada, həm də digər ölkələrdə hazırlanır.
Kulinariya bloqeri "anny.cooking" "TikTok" platformasında öz resept variantını təqdim edib.
Kabaçki və kakao ilə dadlı brauni hazırlamaq üçün aşağıdakı inqrediyentlər tələb olunur:
* ümumi çəkisi təxminən 300 qram olan iki orta ölçülü kabaçki; * iki yumurta; * 150 qram un; * 50 qram kakao tozu; * 10 qram qabartma tozu; * 100 qram şəkər və ya şəkər əvəzedicisi; * zövqə uyğun istənilən giləmeyvə (qaragilə, moruq, çiyələk, qarağat).
Bundan əlavə, təxminən 25 santimetr diametrində bişirmə qabı lazım olacaq.
Pəhriz şokoladlı brauninin dadlı alınması üçün keyfiyyətli təbii kakaodan istifadə etmək vacibdir.
Əvvəlcədən sobanı 180 dərəcəyə qədər qızdırın. Kabaçkiləri yuyun, istənilən formada doğrayın və dərin qaba yerləşdirin. Üzərinə yumurtaları əlavə edib blender vasitəsilə vahid kütlə alınana qədər qarışdırın.
Daha sonra bu qarışığa şəkər (və ya onun əvəzedicisini), un, kakao və qabartma tozu əlavə edin. İstəyə görə giləmeyvə də qata bilərsiniz.
Xəmirin konsistensiyası xamaya bənzəməlidir. Hazır qarışığı perqament kağızı ilə örtülmüş bişirmə qabına tökün. İstəyə görə üzərinə doğranmış şokolad və qoz əlavə etmək olar, lakin kalorini azaltmaq üçün bundan imtina etmək mümkündür.
Deserti 180 dərəcə temperaturda 40-50 dəqiqə bişirin. Hazır olub-olmadığını diş çöpü ilə yoxlamaq olar — çöp quru çıxmalıdır.
Əgər brauninin üst hissəsi bişib, içi isə hələ çiy qalırsa, üzərini folqa ilə örtərək daha 15 dəqiqə sobada saxlamaq tövsiyə olunur.
Hazır piroq içəridən yumşaq və məsaməli, zəngin şokolad ətri ilə olur. Kabaçkinin dadı isə hiss edilmir. Buna görə kabaçki sevməyən uşaqlar belə bu deserti məmnuniyyətlə yeyə və əlavə istəyə bilərlər.
Jalə Demokrat.az
