Qatıq kalsiumun zəngin mənbələrindən biri hesab olunsa da, bu mineralı daha çox ehtiva edən digər qida və içkilər də var.
Demokrat.az xəbər verir ki, bu barədə "Health" nəşri diyetoloq Lindsi DeSotonun yoxladığı məqaləyə istinadən məlumat yayıb.
ABŞ Kənd Təsərrüfatı Nazirliyinin məlumatına görə, 170 qram yağsız qatıqda 284 milliqram kalsium var. Bu, gündəlik kalsium tələbatının təxminən 21,8 faizini təşkil edir. Lakin pendirli kiş, tofu, süd və kefirdə kalsiumun miqdarı daha yüksəkdir.
Məqalədə qeyd olunur ki, süd və süd məhsulları orqanizm tərəfindən asan mənimsənilən kalsium formasını ehtiva etdiyinə görə bu mineralın ən yaxşı mənbələri hesab olunur.
Bununla yanaşı, mütəxəssislər bildirirlər ki, kalsiumun bağırsaqlarda mənimsənilməsi üçün D vitamini də mühüm rol oynayır. Buna görə də orqanizmdə bu vitaminin kifayət qədər olmasına diqqət yetirmək tövsiyə edilir.
Qatıqdan daha çox kalsium ehtiva edən məhsullar
Pendirli kiş
Təxminən 160 qram pendirli kişdə 427 milliqram kalsium var. Bu, gündəlik kalsium tələbatının 32,8 faizinə bərabərdir.
Məqalədə bildirilir ki, kiş yumurta və müxtəlif içliklərlə hazırlanır. Tərkibindəki kalsiumun miqdarı istifadə olunan ərzaqlardan asılı olaraq dəyişə bilər. Məsələn, toyuq və ya balıq əlavə olunmuş standart ölçülü bir dilim kişdə təxminən 371 milliqram kalsium olur.
Tofu
ABŞ Kənd Təsərrüfatı Nazirliyinin məlumatına əsasən, 85 qram qızardılmış tofu 315 milliqram kalsium ehtiva edir. Bu da gündəlik kalsium tələbatının 24,2 faizinə uyğundur.
Tofu həmçinin zülal, A vitamini, fol turşusu, dəmir, maqnezium, kalium, fosfor, selen və çox doymamış yağ turşuları ilə zəngindir.
"European Journal of Nutrition" jurnalında dərc olunmuş araşdırmaya görə, tofu tərkibli qidaların istehlakı ürək-damar xəstəlikləri və onlarla əlaqəli ağırlaşmaların riskini azalda bilər.
Süd
Bir stəkan süddə 305 milliqram kalsium var. Bu, gündəlik kalsium tələbatının 23,5 faizini təşkil edir.
Qatıq südün canlı bakterial mədəniyyətlərlə mayalandırılması nəticəsində əldə olunduğu üçün südün də kalsiumun zəngin mənbələrindən biri olması təəccüblü deyil. Süd həmçinin zülal və kaliumla zəngindir.
Kefir
Bir stəkan kefirdə 316 milliqram kalsium var. Bu, gündəlik kalsium tələbatının 24,3 faizinə bərabərdir.
Kefir adətən inək, keçi və ya qoyun südündən hazırlanan mayalandırılmış içkidir. O, qatığa bənzəsə də, hazırlanmasında bakteriya və mayaların simbiotik kulturasını ehtiva edən kefir dənələrindən istifadə olunur.
Jalə Demokrat.az
