İyulun 4-dən etibarən dörd bürc Mars və Uranın Əkizlər bürcündə qovuşmasının yaratdığı astroloji təsirlə üzləşəcək. Bildirilir ki, bu proses gərgin və gözlənilməz enerji yaradaraq ani dəyişikliklərə və gözlənilməz hadisələrə səbəb ola bilər.
Demokrat.az xəbər verir ki, bu barədə "Parade" jurnalı yazıb.
Astroloqların fikrincə, Mars və Uranın təsiri impulsivliyi, gözlənilməz dönüşləri və qeyri-sabitlik hissini gücləndirə bilər. Xüsusilə aşağıdakı dörd bürcün nümayəndələrinin bu təsiri daha güclü hiss edəcəyi bildirilir.
Əkizlər
Mars və Uran Əkizlər bürcünün şəxsiyyəti, özünüifadəni və xarici görünüşü təmsil edən birinci evinə təsir göstərəcək. Bu dövrdə imici və ya üslubu dəyişmək istəyi yarana bilər. Lakin emosional qərarlar sonradan peşmançılıq doğura bilər. Xüsusilə döymə etdirmək və ya görünüşdə kəskin dəyişiklik etmək kimi addımları tələsmədən atmaq tövsiyə olunur.
Oxatan
Oxatan bürcü üçün Mars və Uran tərəfdaşlıq, nikah və öhdəliklərlə bağlı yeddinci evə təsir göstərəcək. Bu səbəbdən şəxsi və ya iş münasibətlərində gözlənilməz vəziyyətlər yarana bilər. Hətta sabit görünən münasibətlərdə belə gizli məqamlar üzə çıxa bilər. Tələskən reaksiya verməmək və hadisələrin inkişafını diqqətlə izləmək məsləhət görülür. Gərginliyin həftənin sonuna qədər azalacağı ehtimal edilir.
Qız
Qız bürcü üçün bu tranzit karyera, nailiyyətlər və həyat yolu ilə əlaqəli onuncu evi aktivləşdirəcək. Əvvəlki planlar baş tutmasa belə, gözlənilmədən yeni imkanlar yarana bilər. İş və ya peşəkar fəaliyyətlə bağlı vəziyyət qeyri-sabit görünsə də, məhz bu dövrdə dönüş nöqtəsi baş verə bilər. Yeni ideyalar və fərqli yanaşmalar uğur qazanmaq üçün imkan yarada bilər.
Balıqlar
Balıqlar bürcü üçün Mars və Uran ev, ailə və daxili sabitliyi təmsil edən dördüncü evə təsir göstərəcək. Bu dövrdə məişət və ailə həyatında gözlənilməz dəyişikliklər baş verə bilər. Həm gündəlik problemlər, həm də yaxınlarla münasibətlərdə emosional gərginlik yarana bilər. Daxili tarazlığı qorumaq üçün emosiyaları sağlam şəkildə ifadə etmək və özünə qapanmamaq tövsiyə olunur.
Jalə Demokrat.az
