Bakı bazarlarında yay mövsümünün ən qaynar günləri yaşanır. Piştaxtalar rəngbərəng yay meyvələri, təzə göyərtilər və yerli tərəvəzlərlə tamamilə dolub. Alıcılar hələ də qiymətlərin yüksək olmasından şikayət edirlər. Satıcılar isə müştəri qıtlığından və məhsulun tez xarab olmasından gileylənirlər. Paytaxt ticarət mərkəzlərindəki real vəziyyəti, qiymət fərqlərini öyrənmək üçün geniş bir neçə bazara baş çəkdik.
Demokrat.az xəbər verir ki, ilk dayanacağımız şəhərin ən bahalı ticarət mərkəzi sayılan "Yaşıl bazar" oldu. Bura hər zaman digər ticarət obyektlərinə nisbətən yüksək qiymətləri ilə tanınır. Bazara daxil olan kimi bizi xüsusi dizaynla yığılmış meyvə piştaxtaları qarşılayır. Gilas, ərik və şaftalı tamamilə göz oxşayır. Satıcılar məhsulların xüsusi olaraq seçildiyini və tam təbii olduğunu vurğulayırlar. Lakin qiymət lövhələrinə baxdıqda orta statistik paytaxt sakininin buradan bol bazarlıq etməsi çətin görünür. Hazırda gilasın bir kiloqramı növündən asılı olaraq 5 manatdan başlayıb 12 manata qədər yüksəlir. Əriyin kiloqramı isə 4 manatla 7 manat arasında dəyişir.
"Alıcı tapmaqda həqiqətən çox böyük çətinlik çəkirik. Rayonlardan keyfiyyətli məhsulu baha qiymətə alırıq. Üstünə yol xərci və yer pulu da əlavə olunur. Ona görə qiymətləri aşağı sala bilmirik"
Bu sözləri uzun illərdir sözügedən bazarda meyvə satışı ilə məşğul olan Vaqif dayı deyir. Onun sözlərinə görə, əvvəlki illərlə müqayisədə insanların alıcılıq qabiliyyəti xeyli aşağı düşüb. Sakinlər indi kiloqramla deyil, qramla meyvə almağa üstünlük verirlər. Bu da günün sonunda tonlarla məhsulun anbarda qalaraq sıradan çıxmasına səbəb olur. Satıcılar ziyanla işlədiklərini bildirirlər.
Daha sonra şəhər mərkəzindən xeyli kənarda yerləşən "8-ci kilometr" bazarına üz tutduq. Bu məkan xalq arasında ən ucuz bazar statusunu illərdir qoruyur. Həqiqətən də buradakı mənzərə və qiymətlər "Yaşıl bazar" ilə müqayisədə kəskin şəkildə fərqlənir. İnsan sıxlığından hərəkət etmək demək olar ki, mümkün deyil. Buradakı piştaxtalarda gilasın kiloqramını 3-4 manata tapmaq tamamilə realdır. Mövsümün bitmək üzrə olan giləmeyvəsi çiyələk isə 2 manat 50 qəpiklə 4 manat arasında müştərilərə təklif olunur. Sabirabaddan gətirilən qarpızın kiloqramı 70-80 qəpik təşkil edir. Yemişin kiloqramı isə 1 manat 20 qəpikdən satılır.
Bazarda göyərti bölməsində də çox böyük canlanma və sıxlıq müşahidə olunur. Yay fəslində sərinləşdirici qidalarla bərabər göyərtiyə olan tələbat həmişə pik həddə çatır. Qiymətlər isə sevindirici haldır ki, uzun müddətdir sabit qalıb. Keşniş, şüyüd, reyhan və nanənin bir dəstəsi 20-30 qəpik arasında dəyişir. Göy tərəvəzlərdən xiyar və pomidorun qiyməti də alıcıların cibinə uyğundur. Məşhur Zirə pomidorunun kiloqramı 2 manat 50 qəpik, adi pomidor isə 1 manat 50 qəpikdir. Xiyarın qiyməti isə növündən asılı olaraq 1 manatla 1 manat 80 qəpik arasındadır.
"Qiymətlər ötən aya baxanda bir az düşüb. Amma yenə də ailə büdcəsinə ciddi təsir edir. Hər şeydən məcburen az-az almağa çalışırıq. Göyərti və tərəvəz nisbətən ucuzdur. Lakin yaxşı meyvə almaq hələ də bahadır"
Bunu isə bazarlıq edən paytaxt sakini Elmira xanım bildirir. O qeyd edir ki, Bakıda bazarlar arasında qiymət fərqi çox böyükdür. Eyni keyfiyyətdə olan məhsulu şəhərin müxtəlif yerlərində tam fərqli qiymətə görmək olur. Bu da süni qiymət artımından xəbər verir. Sakinlər nəzarətin gücləndirilməsini istəyirlər.
Gəzintimizi tamamlamaq üçün orta təbəqənin üz tutduğu "Nəsimi" bazarına baş çəkdik. Buradakı qiymətlər tam mərkəz ilə kənar bazarların ortasında qərarlaşıb. Piştaxtalarda yerli şaftalının kiloqramı 3-5 manat arasında satılır. Gavalının kiloqramı isə 2 manat 50 qəpik təşkil edir. Satıcılar bildirirlər ki, növbəti həftələrdə bölgələrdən gələn məhsul bollaşacaq. Bununla da qiymətlər bir qədər də enəcək. Hələlik isə bazarlardakı vəziyyət həm alıcıların, həm də satıcıların qarşılıqlı narazılığı ilə davam edir. Hər iki tərəf yay mövsümünün tam dadını çıxarmaq üçün qiymətlərin daha da optimallaşmasını gözləyir.
Demokrat.az
