Anemiya və qan azlığı ilə mübarizədə əsrlərdir ən təsirli vasitələrdən biri hesab olunan doşab, bəzən orqanizm tərəfindən mənimsənilmədən birbaşa xaric olur. Bu şəfalı məhsulun möcüzəvi təsirini ikiqat artırmağın, eyni zamanda faydasını tamamilə sıfıra endirən səhvlərdən qorunmağın elmi formulu bəllidir.
Demokrat.az bildirir ki, süstlük, daimi yorğunluq və üşümə kimi problemləri aradan qaldırmaq, bədənin dəmir ehtiyatını sürətlə bərpa etmək üçün mətbəxdəki iki sadə məhsulu düzgün şəkildə birləşdirmək kifayətdir.
Doşabın tərkibindəki yüksək dəmir bitki mənşəli olduğundan, insan orqanizmi bu növ elementi mənimsəməkdə çətinlik çəkir. Məhz bu mərhələdə limon köməyə çatır. Limonun tərkibindəki zəngin C vitamini doşabdakı dəmirin kimyəvi strukturunu dəyişdirərək onu bədənin asanlıqla qəbul edə biləcəyi formaya salır. Tibb sahəsində aparılan araşdırmalar da sübut edir ki, C vitamini bitki mənşəli dəmirin sorulmasını 300 faizə qədər artırır. Mədə turşuluğunu tənzimləyən komponentlər və limon turşusu bağırsaqlarda dəmir reseptorlarını aktivləşdirərək faydalı maddələrin birbaşa hüceyrələrə ötürülməsini təmin edir.
Bu möcüzəvi effekti əldə etmək üçün qəbul zamanı bəzi qaydalara mütləq riayət olunmalıdır. Əsas şərt səhərlər acqarnına bir xörək qaşığı doşaba bir neçə damcı təzə sıxılmış limon şirəsi əlavə edərək qəbul etməkdir. Digər tərəfdən, bu qarışıqdan dərhal sonra çay və ya qəhvə içmək ən böyük səhvlərdən biridir. Çay və qəhvənin tərkibindəki tanninlər limonun yaratdığı sorulma imkanını bloklayır, dəmiri bağlayaraq orqanizmdən faydasız şəkildə atılmasına səbəb olur. Maksimum səmərəlilik üçün doşab qəbulundan sonra ən azı bir saat gözləmək tövsiyə edilir.
İsmayıl Demokrat.az
