Azərbaycanda çoxuşaqlı ailələrə göstərilən sosial dəstəyin artırılması ilə bağlı yeni təşəbbüs irəli sürülüb. Mövcud qaydalara əsasən, aylıq sosial müavinət əsasən altı və daha çox uşağı olan ailələrə verilir. Pensiya ilə bağlı müəyyən güzəştlər isə beş və daha çox uşağı olan valideynlərə şamil olunur.
Son illərin statistikası göstərir ki, ölkədə çoxuşaqlı ailələrin sayı tədricən azalır. Bu tendensiya əsasən yaşayış xərclərinin artması ilə əlaqələndirilir. Ərzaq və gündəlik tələbat mallarının bahalaşması valideynlər üçün uşaqların saxlanmasını əvvəlki dövrlərlə müqayisədə daha çətin edir.
Demokrat.az-ın baku.ws-ə istinadən yaydığı məlumata görə, Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov bu sahədə dəstəyin genişləndirilməsini təklif edir:
"Təşəbbüsə əsasən, çoxuşaqlı ailə statusunun mərhələli şəkildə üç və daha çox uşağı olan ailələrə də şamil edilməsi nəzərdə tutulur. Bu halda belə ailələr dövlət büdcəsindən aylıq müavinət ala, eyni zamanda uşaqların sayından asılı olaraq valideynlər üçün erkən pensiya imkanları yaradıla bilər. Məsələn, təklifə görə, ailədə üç uşaq olduqda pensiya yaşının bir neçə il azaldılması mümkün ola bilər".
Rəqəmlər də demoqrafik azalmanı açıq şəkildə ortaya qoyur. Belə ki, 2015-ci ildə Azərbaycanda 160 mindən çox uşaq dünyaya gəldiyi halda, 2025-ci ildə bu göstərici 100 minin altına enib.
Beynəlxalq təcrübəyə nəzər saldıqda isə görünür ki, ailə siyasətində uşaqların sayı əsas meyarlardan biri kimi götürülür. Bir çox Avropa ölkəsində sosial dəstək mexanizmləri daha geniş tətbiq edilir və ödənişlər artıq ikinci uşaqdan etibarən verilməyə başlanır.
Demokrat.az
