Almaniyalı qida mütəxəssisi Kristian Vayçert ayaqüstü yeməklər (fastfud) arasında orqanizm üçün ən balanslı seçimin dönər olduğunu açıqlayıb. Mütəxəssis bu qənaətə gələrkən onun tərkibindəki inqrediyentlərin paylanma nisbətini əsas götürüb.
Demokrat.az xəbər verir ki, Vayçert qeyd edir ki, digər fast-fud növləri ilə müqayisədə dönər zülal, karbonhidrat və lif baxımından daha zəngindir. Xüsusilə tərkibindəki təzə kahı, pomidor, soğan və xiyar kimi tərəvəzlər orqanizmin vitamin ehtiyacını qismən qarşılayır. Ətin şaquli şişdə bişirilməsi isə artıq yağların süzülməsinə şərait yaradır ki, bu da onu qızardılmış digər ət məhsullarından daha yüngül edir.
Bununla belə, mütəxəssis bəzi detallara diqqət yetirməyi vacib sayır. Dönərin faydalı nahar seçiminə çevrilməsi üçün tərkibindəki sousların miqdarı və çörəyin növü həlledici rol oynayır. Mayonez əsaslı ağır souslar əvəzinə qatıq və ya bitki mənşəli əlavələrə üstünlük vermək yeməyin qida dəyərini artırır.
Hazırda pəhriz saxlayan və vaxt azlığından şikayət edən şəxslər üçün tərəvəzi bol olan bu təam ən uyğun alternativlərdən biri hesab olunur. Müşahidələr göstərir ki, düzgün seçilmiş inqrediyentlərlə hazırlanan dönər həm doyurucu olur, həm də digər sürətli yeməklər kimi ağırlıq hissi yaratmır.
Kənan Demokrat.az
