Azərbaycanın ödənişli avtomagistrallarında nəqliyyat vasitələrinin hərəkət sürəti ilə bağlı yeni qaydalar tətbiq olunur. Milli Məclisin bu gün keçirilən plenar iclasında “Yol hərəkəti haqqında” qanuna təklif edilən dəyişikliklər birinci oxunuşda qəbul edilib. Yeni layihə yaşayış məntəqələrindən kənarda yerləşən ödənişli yollarda sürət rejiminə yenidən baxılmasını nəzərdə tutur.
Demokrat.az xəbər verir ki, təklifə əsasən, bu yollarda hərəkət edən minik avtomobilləri və çəkisi 3,5 tondan çox olmayan yük maşınları üçün maksimal sürət həddi saatda 130 kilometrə çatdırılır. Digər kateqoriyadan olan nəqliyyat vasitələri, o cümlədən avtobuslar, qoşqulu minik maşınları və ağırçəkili yük avtomobilləri üçün isə yuxarı həddin saatda 90 kilometr olması planlaşdırılır.
Qanunvericilikdə edilən bu dəyişiklik magistral yollarda nəqliyyat axınının daha səmərəli idarə olunmasına və ödənişli yolların üstünlüklərindən maksimum istifadəyə xidmət edir. Layihə parlamentin növbəti oxunuşlarında müzakirə edildikdən sonra qüvvəyə minməsi gözlənilir.
Demokrat.az
