Qazaxıstan Respublikasının parlamentinin aşağı palatası Aida Balayevanın baş nazirin müavini – mədəniyyət və informasiya naziri vəzifəsinə təyin olunması ilə bağlı təklifi dəstəkləyib.
Bizim.Media Qazaxıstan KİV-lərinə istinadən xəbər verir ki, müzakirədən sonra deputatlar təqdim olunmuş namizədi təsdiqləyiblər.
Xatırladaq ki, Aida Balayeva 2000-ci ildə Abay adına Almatı Dövlət Universitetini, 2007-ci ildə isə Qazaxıstan Milli Aqrar Universitetini bitirib.
1999–2004-cü illərdə Almatı vilayətinin İnformasiya və İctimai Razılıq İdarəsində çalışıb. 2004-cü ildə Almatı Şəhər İnformasiya İdarəsinin təhlil və proqnozlaşdırma şöbəsinin rəhbəri olub. 2006-cı ildə Almatının daxili siyasət departamentinin direktoru təyin edilib. 2010–2014-cü illərdə Astananın akim müavini vəzifəsində çalışıb. 2014-cü ildə Prezident Administrasiyasına keçib və daxili siyasət şöbəsinə rəhbərlik edib. 2019-cu ildə Prezidentin köməkçisi – Prezident Administrasiyasının müraciətlərin icrasına nəzarət şöbəsinin müdiri olub.
2020-ci ildə informasiya və ictimai inkişaf naziri təyin edilib. 2022-ci ildə Prezident Administrasiyası rəhbərinin müavini vəzifəsini alıb.
2 sentyabr 2023-cü il tarixli Prezident sərəncamı ilə Aida Balayeva mədəniyyət və informasiya naziri təyin edilib. 6 fevral 2024-cü il tarixli Prezident sərəncamı ilə o, yenidən mədəniyyət və informasiya naziri vəzifəsinə təyin olunub.
