Leysan yağışlar gözlənilir: Əkinçiliyə necə təsir edəcək?

"Çaylarda sululuğun artmasının fərqli təsirləri ola bilər. Çayların mənbələrindən asılı olaraq sulu və bol sulu dövr müşahidə olunur. Qarların intensiv əriməsi və yağıntıların çox olması sululuğun artmasına kömək edir. Suvarma baxımından bunun müsbət tərəfləri var. Suvarılan əraziləri su kifayət qədər çatır, anbarlar lazımı səviyyədə doldurulur".

Bu sözləri Demokrat.az-a açıqlamasında Ekologiya və Təbii Sərvətlər Nazirliyi yanında İctimai Şuranın sədri, ekoloq Amin Məmmədov deyib.

"Həddən çox bol sulu axının olması çaylarda suyun məcradan çıxmasına, daşqına səbəb ola bilir. Əkin sahələrini su basır, torpaq şoranlaşır, qrunt sularının səviyyəsi yuxarı qalxır. Bol yağıntı torpağın münbitliyinə təsir edir. Ərazi və relyefdən asılı olaraq fəsadlar dəyişir. Çaylarda anbarlar olduqda bunu tənzimləmək mümkün olur. Kanallarla, arxlarla suvarma üçün su götürən çaylarda isə məcradan çıxma halı baş verir. Nəticədə əkinçiliyə böyük ziyan dəyir".

Qeyd edək ki, bu il yağıntılar əvvəlki illərə nisbətə çox olub. Önümüzdənki daha üç gün bəzi bölgələrdə leysan yağışlar gözlənilir.

Əfsanə Kamal Demokrat.az