"Pensiyaçılar işləyərək bir işçinin yerini tuturlar" — AÇIQLAMA

Dövlət Sosial Müdafiə Fondunun İdarə Heyətinin sədri Himalay Məmişov bildirib ki, ölkədə 150 minə yaxın pensiyaçı əmək fəaliyyətini davam etdirir. O qeyd edib ki, həmin şəxslər əmək fəaliyyətlərini davam etdirib 6 illik müddəti tamamladıqda, artıq bu müddətdə toplanan kapital müvafiq əmsala bölünməklə pensiyaların üzərinə əlavə ediləcək. Bu da pensiyaların artımına səbəb olacaq.

Təqaüdə çıxdıqdan sonra da bəzi insanları iş həyatına qaytaran səbəblər barədə sosioloq Elçin Bayramlı Demokrat.az-a açıqlama verib.

O deyib ki, bütün ölkələrdə pensiyaya çıxdıqdan sonra işləyən insanlar var:

“Bu olduqca nomal haldır. Ona görə normaldır ki, insan 65 yaşa çatanda əmək fəaliyyəti dayanmır. 90 faiz hallarda bu belədir. Amma burada bir fərq var. Digər ölkələrdə insanlar fəaliyyət etmək, boş qalmamaq üçün işlə məşğul olurlar. Bizdə isə insanlar yaşaya bilmək üçün işləyirlər. Bu göstəricilərin yalnız 10 faizi digər ölkələrdəki kimi ola bilər. Demək olar ki, pensiyaçıların çoxu 300-400 manat civarında pensiya alır. Bu da heç bir nəfərin belə ehtiyaclarını ödəməyə qadir deyil. Bu halda təbii ki, insanlar çalışır ki, çox işləsinlər. Əslində bu, normal deyil. Bəzi Avropa ölkələrində çox yüksək pensiya alan insanlar təmənnasız işləyirlər. Bu halda demək olar ki, həmin insan cəmiyyətə fayda verir. Bizdə isə belələri çox azdır. Bizdə səbəb pensiyaların az olmalısıdır. Bu da yaşlı insanların işləməsinə gətirib çıxarır. Yaşlı insanların xərcləri daha çoxdur.

Başqa bir məsələ isə ölkəmizdə pensiyaçılar işləyərək bir işçinin yerini tuturlar. Avropada isə pensiyaçılar gənclərin tuta biləcəyi işin yerini məşğul etmirlər. Ölkəmizdə isə bu, tam əksinədir. Bu da gənclər arasında işsizliyə gətirib, çıxarır. Təbii ki, pensiyaçıların sevdikləri işdə işləməsi və pensiyasının yüksək olması daha yaxşı olar”.

Törə Zeynallı Demokrat.az