Qurani-Kərimi başa qoymaq adətinin kökündə nə dayanır? — AÇIQLAMA

“Bu gün əksər İslam ölkələrində Ramazan ayında Qədr gecələrində Qurani-Kərimi başa qoymaq adəti yoxdur. Quranı başa qoymaq başqa dinlərdən, əvvəlki inanclardan qalma ayinlərin tərkib hissəsidir. Allaha imanla deyil, bu cür buyurulmamış əməllərlə yaxınlaşmaq dayanır bu ritualın mahiyyətində və bidət hesab olunur. İslam ümmətini parçalamaq, arada fərqlər yaratmaq, mübahisələr doğurmaqdan ötrü belə bir ritual ortaya atılıb. Bu cür ayinlər məzhəbçilik intriqası yaratmaq məqsədi güdür”.

Bunu Demokrat.az-a açıqlamasında ilahiyyatçı Tural İrfan deyib.

Onun sözlərinə görə İslam dinində bütün ibadətlər Allahın Qurani-Kərimdə nazil etdiyi şəkildə, Peyğəmbərimizin buyurduğu formada həyata keçirilməlidir:

“Heç kim hər istədiyi yeniliyi dinə gətirə bilməz. Belə olarsa, İslam dini də özündən əvvəlki dinlər kimi təhrifə uğrayar.

Son dövrlərdə təəssüf ki, bəzi xarici qüvvələrin təsiri ilə din adı altında cəmiyyətimizə xurafat yeridilir. Dindən anlayışı olmayan, amma onu öyrənmək istəyən şəxslər də xurafatla məşğul olan ruhanilərin təlqin etdiyi qaydalara tabe olurlar. İmamların dövrünə aid müxtəlif hədislər uydurulub. Guya Həzrəti Əli Quranın nüsxələrini başına qoyaraq ibadət edib. 50-60 kq ağırlığında olan nüsxəni Həzrəti Əli necə başının üstündə saxlaya bilərdi? Əgər belə idisə, bu, başqalarına da tövsiyə edilməli idi, çünki peyğəmbərlər, imamlar gördükləri gözəl işləri başqalarına da məsləhət ediblər. Qurani-Kərim oxumaq üçün, içindəki hikmətlərdən xəbərdar olmaq üçün nazil edilib, başın üzərinə, evin əlçatmaz hissəsinə qoymaq, maşından asmaq üçün deyil”.

Törə Zeynallı Demokrat.az