“Azı 140-150 min uşaq məktəbəqədər təhsilə cəlb edilməlidir” — Ekspert

Məktəbəqədər təhsilin əhatə dairəsinin genişləndirilməsi, müxtəlif səbəblərdən məktəbəqədər təhsillə əhatə oluna bilməyən uşaqların cəlb edilməsi Elm və Təhsil Nazirliyinin əsas strateji hədəflərindəndir. Bu məqsədlə nazirlik tərəfindən alternativ modellərin tətbiqi nəzərdə tutulur. Elm və Təhsil Nazirliyindən bildirilib ki, ilk dəfə həyata keçirilən “Alternativ məktəbəqədər təhsil xidmətlərinin təşkili” pilot qrant proqramı da bu istiqamətdə görülən işlərdən biridir. Qeyd edilən proqrama 19 layihə təqdim edilib və onlardan 16-sı qrant qazanıb. Qrant qazanmış layihələr Bakı, Naxçıvan, Astara, Füzuli, Göygöl, Lənkəran, Masallı, Şəki, Şirvan, Zaqatala üzrə olmaqla ümumilikdə 16 rayon və şəhəri əhatə edir. İl ərzində həyata keçiriləcək layihələrin əsas benefisiarları müxtəlif səbəblərdən məktəbəqədər təhsillə əhatə oluna bilməyən uşaqlardır. Layihələr çərçivəsində uşaqların alternativ təhsil modellərinin köməyi ilə məktəbəqədər təhsilə cəlb edilməsi təmin olunacaq.

Təhsil eksperti Elçin Əfəndi Demokrat.az-a açıqlamasında deyib ki, respublikanın müxtəlif bölgələrində, o cümlədə paytaxtın bəzi ərazilərində uşaqların məktəbəqədər təhsilə cəlb olunması ilə bağlı problem var:

“Bununla bağlı müvafiq tədbirlər planı və qrant layihələr hazırlanaraq nazirliyə təqdim olunub. Məktəbəqədər təhsil pilləsinə uşaqların erkən yaşlarda cəlb olunması vacibdir. Müxtəlif səbəblərə görə valideynlər övladlarını bağçalara yazdıra bilmirlər, maliyyə problemi yaşayırlar və ya bağçalara güvənmirlər. Həmin uşaqlar üçün evdə məktəbəqədər təhsil pilləsi səviyyəsində tədris təşkil oluna bilər, həmçinin bir neçə uşağı toplayıb məktəbin razılığı əsasında orada bu prosesə cəlb etmək mümkündür. Müxtəlif üsulların tətbiqi ilə bunu həyata keçirmək olar. Nəticədə məktəbə hazırlıqlı gedən uşaqların sayı artacaq. Ən azı 140-150 min uşağın məktəbəqədər təhsildə iştirak etməsinə şərait yaradılmalıdır. Düşünürəm ki, valideynlər də bu məsələdə maraqlı olmalıdırlar. Tək təşviq etmək deyil, həmçinin valideynlərdə bağçalara güvən formalaşdırılmalıdır, onlar uşaqlarını bağçalara qoymaqda həvəsli olmalıdırlar. Məktəbəqədər təhsil pilləsi təhsil sisteminin ən kritik, eyni zamanda da vacib dövrüdür. Bu yaşlarda uşaqlara nə qədər bilik və bacarıq öyrədə bilsək, onlarda müəyyən istiqamətlər üzrə vərdişlər formalaşdıra bilsək, daha yuxarı təhsil pillələrində uğurlu nəticələr əldə etmələrinə təkan vermiş olarıq”.

Törə Zeynallı Demokrat.az