"1-5,10, 20 manata ehtiyac hiss olunur, yeni 5 qəpikliyin buraxılması hansı zərurətdən doğur?” — İqtisadçı

Azərbaycanda yenilənmiş 5 qəpiklik metal pul nişanları tədavülə buraxılıb.

Mərkəzi Bankın yaydığı məlumata görə yeni pul nişanının arxa tərəfində Dövlət Gerbinin təsviri və nişanın buraxılış ili əks olunub. Pul nişanının digər dizayn elementləri və texniki parametrləri olduğu kimi saxlanılıb. Yenilənmiş 5 qəpiklik metal pul nişanı hazırda tədavüldə olan eyni nominallı pul nişanları ilə paralel olaraq dövriyyədə olacaq.

Sosioloq Elçin Bayramlının fikrincə, yenilənmiş 5 qəpikliklər əvəzinə 3 manatlıq əskinazlar tədavülə buraxılmalıdır. O feysbuk hesabında yazıb ki, xırda pul funksiyasını çoxdandır ki, 1 manatlıqlar oynayır:

“Artıq heç nəyə yaramayan və heç kimə lazım olmayan 5 qəpikliklər buraxmaqdansa zəhmət çəkib 3 manatlıqlar buraxmaq lazımdır. Əvvəla, nəinki 5, heç 10, 20, 50 qəpiyə də demək olar ki heç nə düşmür, məsələn, adi kiçik bulka belə 60-70 qəpikdir. Dilənçiyə 20 qəpik verəndə götürmür ki, buna heç çöp də düşmür. Bu halda xırda pul funksiyasını artıq çoxdandır ki, 1 manatlıqlar oynayır. Lakin əskinas iyerarxiyası birbaşa 1-dən 5-ə dırmaşdığından xırda pul qıtlığı yaranır. Ona görə də 3 manatlıqların olmaması problemi daha da gərginləşdirir. Bunun əvəzində durub əhalinin 95 faizinin hələ də "mübarək" üzünü görmədiyi və faktiki olaraq gündəlik ticarətdə istifadə olunmayan 200 və 500 manatlıqlar buraxmaqda məqsədin nə olduğu elmə məlum deyil. Qısası son 2 ildə manat real dəyərini faktiki olaraq 2 dəfə itirib. Nominal dəyər isə sadəcə rəqəmdən ibarətdir ki, bunun da heç bir mənası yoxdur”.

İqtisadçı Əkrəm Həsənov da sosioloqla eyni fikirdədir. O, Demokrat.az-a açıqlamasında deyib ki, Mərkəzi Bank ölkədə daha çox hansı əskinaza ehtiyac olduğu barədə statistika aparmalıdır:

“Nəinki 5 qəpik, heç 10 qəpik də artıq istifadə olunmur. Xırda pula – 1-5 manata, 10 manata, 20 manata hətta ehtiyac hiss olunur. Mərkəzi Bank əvvəla statistika aparmalıdır ki, hansı əskinaza tələbat yüksəkdir. 20 və 50 qəpik nədəsə istifadə olunur, 5 qəpiklik niyə yenilənib, başa düşmürəm. Yaxşı olar ki, Mərkəzi Bank buna aydınlıq gətirsin ki, yeni 5 qəpikliyin buraxılması hansı zərurətdən doğur”.

Törə Zeynallı Demokrat.az