Azərbaycan Respublikası İpoteka və Kredit Zəmanət Fondu tərəfindən bu ildən bəri güzəştli ipoteka kreditləri üçün müraciət edən jurnalistlərin sayını açıqlayıb.
Fonddan Demokrat.az-ın informasiya sorğusuna cavab olaraq bildirilib ki, 2023-cü ildə Azərbaycan Respublikası İpoteka və Kredit Zəmanət Fondunun vəsaitləri hesabına güzəştli ipoteka kreditləri üzrə müraciətlərin qəbulu fevral ayının 2-dən başlanıb.
"Ötən dövr ərzində jurnalistlərdən güzəştli ipoteka krediti almaq məqsədilə 3 müraciət daxil olub. Onlardan 2 nəfərinə yaşayış sahəsinin alınması üçün güzəştli ipoteka kredit ayrılıb", - deyə məlumatda qeyd olunub. 
Həmçinin, bu ildən Azərbaycanda jurnalistlər də güzəştli ipoteka ilə mənzil əldə edə bilərlər.
Bu barədə Azərbaycan Respublikası Prezidentinin 2016-cı il 22 iyun tarixli 940 nömrəli Fərmanı ilə təsdiq edilmiş “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”nda dəyişiklik edilməsi haqqında Prezidentin Fərmanında qeyd edilir.
Fərmana görə, “Azərbaycan Respublikası İpoteka və Kredit Zəmanət Fondunun vəsaiti hesabına ipoteka kreditinin, o cümlədən güzəştli ipoteka kreditinin verilməsi Qaydası”na 3.2.1-ci yarımbəndə əlavə edilir.
Yeni əlavəyə görə, ən azı 5 il jurnalist işləyən gənc ailə üzvlərilə yanaşı ən azı 15 il jurnalist işləyən və reyestrə daxil edilən şəxslərə də aiddir.
Elmar Heydərli Demokrat.az
