Münhen Konfransından sonra sərhəddə niyə təxribat törədildi?

"Münhen Təhlükəsizlik Konfransından və bu konfrans çərçivəsində keçirilən üçtərəfli görüşdən sonra Azərbaycan ərazilərinin atəşə tutulması, şübhəsiz ki, bölgədə sülhün və təhlükəsizliyin təmin olunmasında maraqlı olmayan qüvvələrin növbəti təxribatıdır".

Bu fikirləri Demokrat.az-a açıqlamasında siyasi şərhçi Elçin Mirzəbəyli deyib. O, məsələyə iki kontektsdən yanaşmanın vacibliyini vurğulayır:

"Birinci, şübhəsiz ki, Azərbaycan Naxçıvan Muxtar Respublikası istiqamətindən və Tovuz rayonu istiqamətindən ərazilərinin atəşə tutulması, bu kontekstdən həyata keçirilən tədbirlər, bölgədə yenicə gələn Avropa İttifaqı missiyasının bilavasitə "şahid" ola biləcək hansısa bəhanələr uydurmasından ibarətdir. Yəni, Ermənistanın, bölgədə marağı olan dövlətlərin məqsədi ondan ibarətdir ki, sərhəd ərazilərində konflikt baş versin. Bu münaqişə ilə qarşıdurmanın məsuliyyətini də Azərbaycanın üzərinə yıxmaq üçün bəhanə yaradılsın. Şübhəsiz ki, belə bir bəhanənin yaradılmasında çoxsaylı qüvvələr var. Təkcə Avropa İttifaqı missiyasını bu əraziyə göndərməkdə maraqlı olan qüvvələr deyil, eyni zamanda regional qüvvələr də qarşıdurmanın baş verməsində, bəhanənin yaradılmasında maraqlıdır".

"Bundan bir müddət öncə Ermənistanla İranın Azərbaycan ərazilərində və sərhəd bölgəsində təxribat törətməsi barədə yayılan kəşfiyyat məlumatları da əslində belə bir istəyin olduğunu və bu istəyə nail olmayan Ermənistan və İranın, xüsusilə də indiki şəraitdə rəsmi İrəvanın fərqli istiqamətdə təxribatlara əl atdığını təsdiqləyir. Digər məqam isə Azərbaycan ərazilərində sülhməramlı missiyanın yerləşdiyi ərazilərdən silahlı erməni qruplarının Azərbaycan ərazilərinin atəşə tutulmasıdır. Bu da şübhəsiz ki, Münhen görüşündə Ruben Vardanyanla bağlı səsləndirilən israrlı mövqedən sonra separatçıların nümayiş etdirdiyi təxribat ola bilər. Yaxud da, separatçıların, eyni zamanda Ruben Vardanyanın arxasında dayanan qüvvələrin də bu təxribatı həyata keçirməsi mümkündür. Çünki indiki şəraitdə proses Azərbaycan ərazilərində rus sülhməramlıların bilvasitə nəzarəti altında olan ərazilərdə baş verir. Belə olduğu təqdirdə, bu silahlı təxribatın məsuliyyəti həm də rus sülhməramlıların üzərinə düşür və belə bir təsəvvür də formalaşır ki, təxribatın həyata keçirilməsinə məhz Rusiya sülhməramlıları imkan yaradıblar", - deyə E. Mirzəbəyli qeyd edib.

Nəzrin Hüseynli Demokrat.az