"1990-ci illərdə Azərbaycanı düşdüyü girdabdan çıxaran ümummilli lider Heydər Əliyev cəmiyyətin bütövləşməsi, azərbaycançılıq ideologiyasının, milli həmrəyliyin aparıcı amilinə çevrilməsi istiqamətində mühüm işlər görərək, ümumxalq birliyinin əsaslarını irəli sürdü. Ulu öndər azərbaycançılığı vahid sistem və konsepsiya halına gətirərək onu dövlət idarəçiliyinin əsasına çevirdi. Məhz Heydər Əliyevin fəaliyyəti ilə azərbaycançılıq ideologiyası mahiyyətcə real məzmun daşıyaraq reallığa çevrildi".
Bu fikirləri Demokrat.az-a açıqlamasında Milli Məclisin deputatı Müşfiq Cəfərov deyib. O, qeyd edib ki, Heydər Əliyev dühası azərbaycançılığı milli ideologiyaya çevirməklə cəmiyyətin həmrəylik və bütövlüyünə, mənəvi birliyinə nail olmuşdu:
"Ulu Öndər daim vurğulayırdı ki, azərbaycançılıq ideologiyası real müstəqilliyə nail olmaq, vahid, bölünməz Azərbaycanı qoruyub saxlamaq və möhkəmləndirmək üçün vasitədir. Onun dövlət və vətəndaş anlayışlarını üzvi şəkildə özündə birləşdirən bu ideologiyası Qarabağı cəmi 44 günə azad etmək üçün uğurlu təməl oldu. Azərbaycançılıq ideologiyası dünya azərbaycanlılarının vahid ideya ətrafında birləşməsini şərtləndirən tarixi-siyasi amillərin ən vacibi, habelə azərbaycanlı anlayışının sosial-fəlsəfi məzmununu müəyyənləşdirən konsepsiyadır". 
Millət vəkilinin sözlərinə görə, Heydər Əliyevin siyasi davamçısı prezident İlham Əliyev azərbaycançılıq məfkurəsinə böyük önəm verir və onu məharətlə davam etdirir:
"2023-cü il Ulu Öndərə həsr olunmasıyla əlaqədar təşkil olunacaq tədbir və konfranslar gənc nəslə görkəmli Azərbaycan siyasətçisinin həyat yolu və fəaliyyətiylə tanış olmaq fürsəti kimi qiymətləndirilməlidir. Düşünürəm ki, hər bir cəmiyyət dahi şəxsiyyətlərinin keçdiyi fəaliyyət yolunu gənclərə nümunə kimi təqdim etməlidir".
Aynurə Pənahqızı Demokrat.az
