Zaqatala Dövlət Qoruğu tərəfindən keçirilən tender müsabiqəsinin qalibi məlum olub.
Yeniavaz.comaçıqlanan rəsmi məlumatlara istinadən bildirir ki, tender müsabiqəsinin qalibi“Techno Group Azerbaijan” MMC (VÖEN- 1905167681) olub.
“Techno Group Azerbaijan” MMC Zaqatala Dövlət Qoruğuna 1 ədəd fotoaparat dəsti və 1 ədəd fotoaparat üçün obyektiv satacaq. MMC satacağı fotoaparatın qarşılığında 15 min 902 manat alacaq. Nizamnamə kapitalı 100 manat olan “Techno Group Azerbaijan” MMC -nin hüquqi ünvanı Suraxanı rayonu, AB yaşayış sahəsi (Yeni Günəşli qəs.), ev 139, m. 24-də yerləşir. MMC-nin qanuni təmsilçisi Qasımova Könül Ramazan qızıdır.
Tender müsabiqəsinin maraqlı və qəribə tərəfi odur ki, qalib şirkət – “Techno Group Azerbaijan” MMC tender müsabiqəsinin başlamasından cəmi 2 ay əvvəl dövlət qeydiyyatına alınıb. Zaqatala Dövlət Qoruğu tender müsabiqəsini (Kotirovka sorğusu) avqust ayının 10-da elan edib. Tender müsabiqəsinin qalibi olan “Techno Group Azerbaijan” MMC isə iyun ayının 6-da dövlət qeydiyyatına alınıb.
Məlumat üçün onu da bildirək ki, "Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlılığının olması lazımdır.
Cəmi 2 ay əvvəl yaranan şirkətin hansı peşəkarlığa və təcrübəyə sahib olduğu da başa düşülən deyil.
