“Rusiya gündən-günə nüfuzunu itirir”— ŞƏRH

Rusiyanın müdafiə naziri, ordu generalı Sergey Şoyqu deyib ki, “Ukrayna qoşunları üçün silah-sursat gətirən NATO nəqliyyat vasitələri məhv ediləcək”. Onun sözlərinə görə, Ukrayna Silahlı Qüvvələrinin ehtiyacları üçün ölkə ərazisinə silah və ya materiallar gələn istənilən nəqliyyat vasitəsini məhv etmək onlar üçün qanuni hədəf hesab olunur.

Müdafiə naziri Sergey Şoyqunun açıqlamasını şərh edən "Beynəlxalq Münasibətlər və Diplomatiya Araşdırmaları Mərkəzi"nin rəhbəri Samir Hümbətov Demokrat.az-a açıqlamasında deyib ki, Rusiyanın əsas məqsədi Ukraynaya silah-sursat, hərbi texnika verən istənilən bir ölkəni, istənilən bir qurumu bu məsələdə kənarlaşdırmaqdır:

“Məsələ burasındadır ki, indiyədək Ukraynaya dəstək vermiş ölkələr bu məsələdə geri addım atmaq istəmir. Düşünmürəm ki, həmin dövlətlər istər Sergey Şoyqu, istər Vladimir Putin, istərsə də digər şəxslərin təhdidlərinə boyun əyəcəklər, geri çəkiləcəklər və dəstək verməyəcəklər. Nəzərə alsaq ki, ABŞ tərəfi də yenidən 33 milyard dollarlıq yardım paketini Ukraynaya göndərmək niyyətindədir və bunu geri çevirməyəcək. Bu, onu göstərir ki, Sergey Şoyqunun söylədiyi bu ifadələr onlar üçün o qədər də əhəmiyyətli deyil. Təbii ki, Rusiya istəyir ki, bunun qarşısını alsın və ya müharibəni udmaq üçün bu bir vasitə də ola bilər. Amma bunu bacarmayacaq. Çünki burada Ukraynaya yardım edəcək bir yox, bir neçə dövlətdir. Ona görə, bunun qarşısını almaq çətindir”.

“Digər tərəfdən hesab edirəm ki, bu açıqlama Rusiyanın gücsüzlüyünün əlamətidir. Çünki Rusiya müharibədə bacara bilmədiyi üçün kənar dövlətlərin Ukraynaya yardım etməsinə razı deyil. Amma məsələ burasındadır ki, bu dövlətlər açıq şəkildə bildirirlər ki, Ukrayna özünü müdafiə edir və biz də ona yardım edirik. Əlbəttə ki, Rusiya bu cür bəyanatlar verməklə, əslində getdikcə özlərinin nüfuzunu itirirlər. Hesab edirəm ki, onların bu açıqlamalarından heç də NATO ölkələri narahat deyil”- deyə, S.Hümbətov qeyd edib.

Aynurə Pənahqızı Demokrat.az