"Azərbaycan Zəngəzur dəhlizinin işə salınmasında xüsusi iradəyə malikdir" — ŞƏRH

"Cənubi Qafqaz hər bir ölkə üçün həssas bölgədir. Regionda dayanıqlı sülhün formalaşması üçün kommunikasiyaların bərpası çox vacibdir. Kommunikasiyaların açılması isə paralel bərpa olunmalıdır. Bu, həmçinin Zəngəzur dəhlizinin istifadəyə verilməsində özünü göstərməlidir".

Bu sözləri Demokrat.az-a açıqlamasında Milli Məclisin deputatı Vüqar Bayramov deyib.

Millət vəkili bildirib ki, Zəngəzur dəhlizinin açılması tarixi zərurətdir və məsələ ancaq Azərbaycanın iradəsi ilə həll ediləcək:

"Azərbaycanın bu istiqamətdə mövqeyi bəllidir. Cənab Prezidentin qeyd etdiyi kimi, Ermənistanın istəyindən asılı olmayaraq, Zəngəzur dəhlizi açılacaq. Dəhlizin fəaliyyətə başlaması 10 noyabr üçtərəfli bəyanatın prioritetlərindən biridir. Nəzərə alsaq ki, bu, Azərbaycanın Qərb bölgəsi ilə Naxçıvan Muxtar Respublikasının və Türk dünyasının birləşməsi deməkdir".

Həmçinin, Zəngəzur dəhlizindən qonşu ölkələr, o cümlədən Rusiya və İran da istifadə etmək imkanı qazanacaq. Zəngəzur dəhlizi regionun inkişafı və bölgədə əməkdaşlıq baxımından yeni imkanlar yaradacaq. Azərbaycan qalib ölkədir, biz 44 günlük müharibədən sonra Cənubi Qafqazda yeni reallığın formalaşdığını müşahidə edirik. Formalaşmaqda olan yeni reallıq birmənalı şəkildə Zəngəzur dəhlizi daxil olmaqla, bütün kommunikasiyaların açılmasını ehtiva edir. Bu baxımdan, Ermənistanın hansı mövqe tutmasından, revanşist meyillərin güclənib-güclənməməsindən asılı olmayaraq, Azərbaycan Zəngəzur dəhlizinin işə salınmasında xüsusi iradəyə malikdir. Bu iradə də imkan verəcək ki, biz yaxın zamanda Zəngəzur dəhlizinin açılmasını müşahidə edə bilək".

Aygül Qarayeva Demokrat.az