Marketlərdə tez-tez yan-yana satılan soda və mineral su bir çox insan tərəfindən eyni içki hesab olunur. Hər ikisinin qazlı olması bu qarışıqlığa səbəb olsa da, onların əldə edilmə üsulu və tərkibi tamamilə fərqlidir.
Demokrat.az xəbər verir ki, bu barədə türkiyəli mütəxəssis, doktor Fevzi Özgönül danışıb. Məlumatı "Onedio" nəşri yayıb.
Mütəxəssisin sözlərinə görə, təbii mineral su yeraltı mənbələrdən əldə edilir və tərkibində təbii şəkildə həll olmuş mineral duzlar, müxtəlif elementlər və qazlar olur. Onu digər içməli sulardan fərqləndirən əsas xüsusiyyət mineralları mənbəyindən çıxdığı andan etibarən özündə ehtiva etməsidir.
Mineral suyun tərkibində bikarbonat, sulfat, xlorid, kalsium, maqnezium, flüor, dəmir və natrium kimi maddələr mövcuddur.
Soda isə fərqli üsulla hazırlanır. Özgönülün izahına görə, içməli suya sonradan karbon qazı və bikarbonat əlavə etməklə soda əldə edilir. Başqa sözlə, mineral su təbii mənbədən götürüldüyü halda, soda adi suyun qazlaşdırılması yolu ilə hazırlanır.
Mütəxəssis bildirir ki, soda və mineral suyun ortaq xüsusiyyətlərindən biri mədədə müəyyən rahatlıq yaratmasıdır. Lakin onların funksiyaları bununla məhdudlaşmır. Təbii mineral su tərkibindəki minerallar sayəsində orqanizmin bəzi mineral ehtiyaclarının qarşılanmasına da kömək edir.
Özgönül xüsusilə maqnezium, kalsium və flüorla zəngin mineral suların əhəmiyyətini vurğulayır. Onun sözlərinə görə, bu içkilərdəki sulfat və bikarbonat həzm sisteminə müsbət təsir göstərə, bikarbonat isə mədə turşuluğunun artdığı hallarda müəyyən rahatlıq yarada bilər.
Mineral su yay aylarında və idmandan sonra tərləmə nəticəsində itirilən bəzi duz və mineralların bərpası üçün də faydalı seçim hesab olunur. Tərkibindəki kalsium sümük sağlamlığı, flüor isə dişlərin qorunması baxımından əhəmiyyət daşıyır.
Mütəxəssis təbii mineral su seçərkən məhsulun etiketinin oxunmasını tövsiyə edir. Çünki müxtəlif markaların mineral tərkibi və maddələrin miqdarı bir-birindən xeyli fərqlənə bilər.
Bu səbəbdən içkinin üzərindəki məlumatları yoxlamaq, xüsusilə natrium və digər mineralların miqdarına diqqət yetirmək vacibdir. Təbii mineral su ilə sodanı fərqləndirməyin ən etibarlı yollarından biri də məhz məhsulun tərkibini və mənşəyini yoxlamaqdır.
