Müasir texnologiyalar gündəlik həyatı asanlaşdırsa da, bazardakı bütün elektron cihazlar aldıqları pula dəyər deyil. Bəzi qurğular smartfonların imkanları ilə əvəz oluna bilir, digərləri isə istifadəçilərə real fayda verməyən əlavə funksiyalarla qiymətlərini artırır.
Demokrat.az xəbər verir ki, "SlashGear" nəşri ekspertlərin fikirlərinə əsaslanaraq, 2026-cı ildə alınması əksər hallarda məqsədəuyğun sayılmayan səkkiz texnoloji cihazın siyahısını hazırlayıb.
1. Avtomatik qəhvə dəmləyən aparatlar
Bu cihazlar əvvəlcədən qəhvə və su əlavə etməklə, səhər oyanan zaman hazır içki əldə etməyə imkan verir. Bəzi modelləri "Amazon Alexa" kimi ağıllı ev köməkçiləri vasitəsilə də idarə etmək mümkündür. Lakin qəhvənin axşamdan aparata qoyulması onun təzəliyini və dadını azalda bilər. Üstəlik, istifadəçi yenə də su və qəhvəni özü əlavə etməlidir. Buna görə də adi damcı tipli qəhvə aparatı və ya dənələri dəmləmədən əvvəl üyüdən model daha məqsədəuyğun seçim hesab olunur.
2. Toxunmadan işləyən sabun dispenserləri
Sensor vasitəsilə əli yaxınlaşdıran kimi sabun verən qurğular xüsusilə pandemiya dövründə populyarlaşıb. Ancaq onların gündəlik istifadədə nə dərəcədə zəruri olduğu sual doğurur. Çünki insan sabun dispenserindən istifadə etdikdən sonra onsuz da əllərini yuyur. Mütəxəssislərin fikrincə, toxunmadan işləyən kran daha faydalı ola bilər.
3. Ağıllı soyuducular
Böyük ekranlı və internetə qoşulan soyuducular musiqi səsləndirmək, reseptlər göstərmək, fotoşəkilləri nümayiş etdirmək və digər ağıllı ev cihazları ilə əlaqə yaratmaq imkanına malikdir. Lakin bu funksiyalar texnikanın qiymətini xeyli artırır. Digər problem isə kibertəhlükəsizliklə bağlıdır. Adi soyuducu 10 ildən artıq işləyə bildiyi halda, proqram təminatının istehsalçı tərəfindən bu müddət ərzində dəstəklənəcəyinə zəmanət yoxdur.
4. Elektron zəngli saatlar
Ayrıca zəngli saat almaq əksər istifadəçilər üçün artıq zəruri deyil. Çünki müasir mobil telefonların hamısında bu funksiya mövcuddur. Telefonu səyahət zamanı da rahatlıqla istifadə etmək mümkündür. Alternativ olaraq, "Google" və "Amazon"un ağıllı dinamikləri vasitəsilə səsli əmrlə oyanma vaxtını təyin etmək olar.
5. MP3 pleyerlər
Bir vaxtlar musiqi dinləmək üçün əsas vasitələrdən olan MP3 pleyerlər smartfonların yayılması ilə əvvəlki əhəmiyyətini itirib. Müasir telefonlar musiqiləri yaddaşda saxlamaqla yanaşı, "Spotify" və "Apple Music" kimi platformalardan istifadə etməyə imkan verir. Ayrıca pleyer almaq isə əlavə xərc, başqa bir cihazın enerji səviyyəsini izləmək və musiqi siyahısını mütəmadi yeniləmək deməkdir.
6. DVD və Blu-ray pleyerləri
Fiziki disklərdə film və serial kolleksiyası saxlamağı sevənlər hələ də var. Bununla belə, ayrıca DVD və ya Blu-ray pleyeri almağa ehtiyac olmaya bilər. "Xbox" və "PlayStation" kimi oyun konsollarının bir çox modeli bu diskləri oxuya bilir. Filmlərin rəqəmsal nüsxələrini xarici sərt diskdə və ya SSD-də saxlamaq da mümkündür.
7. Kompakt rəqəmsal fotoaparatlar
2000-ci illərin əvvəllərində geniş yayılan kiçik rəqəmsal fotoaparatlar indi əvvəlki üstünlüklərini böyük ölçüdə itirib. Müasir orta seqment smartfonları belə çox vaxt bu kameralardan daha keyfiyyətli çəkiliş, rahat idarəetmə və şəkilləri asan paylaşmaq imkanı təqdim edir. Xüsusi çəkiliş ehtiyacları istisna olmaqla, gündəlik fotoşəkillər üçün telefon kamerası əksər istifadəçilərə kifayət edir.
8. USB fləş yaddaşlar
USB fləşkartlar faylları internet bağlantısı olmadan daşımaq üçün əlverişli vasitə olaraq qalır. Lakin gündəlik işlərdə yeni qurğu almaq həmişə vacib deyil. Təqdimatlar, sənədlər və fotoşəkillər üçün mövcud yaddaş qurğularından istifadə etmək mümkündür. Bundan başqa, işlənmiş fləşkartlar da münasib qiymətə tapıla bilər.
Nəşrin qənaətinə görə, bu cihazların hamısı tamamilə yararsız deyil. Ancaq onların bir çoxunun funksiyalarını artıq istifadəçilərin sahib olduğu smartfonlar, oyun konsolları və digər qurğular yerinə yetirə bilir. Buna görə də texnoloji yenilik alarkən əlavə imkanların gündəlik həyatda həqiqətən lazım olub-olmadığını nəzərə almaq vacibdir.
Jalə
