Bayram süfrəsi üçün siyənək balığı, xiyar, xama və krem pendirlə hazırlanan zərif qəlyanaltı maraqlı seçim ola bilər. Galantin formasında hazırlanan bu yemək həm görünüşü, həm də kəsildikdə ortaya çıxan rəngli quruluşu ilə diqqət çəkir.
Demokrat.az xəbər verir ki, resepti UNIAN nəşri təqdim edib.
Lazım olan ərzaqlar
- 400 qram az duzlu siyənək balığının filesi
- 500 qram təzə xiyar
- 200 qram 15–20 faiz yağlı xama
- 120 qram krem pendir
- 100 ml su
- 20 qram jelatin
- 30 qram yaşıl soğan
- 15 qram şüyüd
- Qara istiot – zövqə görə
- Lazım gələrsə, duz
Hazırlanma qaydası
Əvvəlcə jelatini soyuq suya əlavə edib qablaşdırmada göstərilən müddət ərzində şişməyə qoyun. Daha sonra qaynatmadan, tam həll olunana qədər ehtiyatla qızdırın.
Siyənək balığının filesini sümük qalıqlarından təmizləyib kiçik kublar şəklində doğrayın. Xiyarların yarısını da eyni qaydada doğrayın. Qalan xiyarları iri sürtgəcdən keçirib suyunu yaxşıca sıxın. Yaşıl soğanı və şüyüdü xırda doğrayın.
Ayrı qabda xama ilə krem pendiri qarışdıraraq hamar kütlə əldə edin. Bu qarışımdan bir qədərini həll edilmiş jelatinə əlavə edib qarışdırın, sonra jelatinli qarışığı əsas kütləyə tökün.
Ardınca doğranmış siyənək balığını, xiyarları, göyərtini və qara istiotu əlavə edib yaxşıca qarışdırın. Duzun miqdarını yoxlayın və ehtiyac olarsa, az miqdarda duz əlavə edin.
Hazır qarışığı silikon qəlibə və ya qida plyonkası ilə örtülmüş qaba yerləşdirin. Soyuducuda ən azı 5–6 saat, daha yaxşı nəticə üçün isə bütün gecə saxlayın. Yeməyi dondurucuya qoymaq məsləhət görülmür.
Süfrəyə verməzdən əvvəl qəlyanaltını qəlibdən ehtiyatla çıxarın. Üzərini təzə xiyar, şüyüd və ya yaşıl soğanla bəzəyərək dilimlərə bölün.
Məsləhət: Qəlyanaltının formasını yaxşı saxlaması və səliqəli dilimlənməsi üçün sürtgəcdən keçirilmiş xiyarın suyunu tam sıxmaq, yeməyin isə soyuducuda kifayət qədər bərkiməsini gözləmək vacibdir. Galantini qapalı qabda soyuducuda iki gündən artıq saxlamamaq tövsiyə olunur.
Jalə
