Elə görünür ki, evdə indicə səliqə yaradılıb, amma bir neçə dəqiqəlik diqqətin yayınması kifayətdir ki, dağınıqlıq yenidən ortaya çıxsın.
Demokrat.az-ın məlumatına görə, məkanın təşkili üzrə peşəkar ekspertlər "The Spruce" nəşrinə bildiriblər ki, evdəki dağınıqlığı azaltmaqla yanaşı, onun yenidən yaranmasının qarşısını almağa kömək edən effektiv üsullar var.
Onların sözlərinə görə, əsas üsullardan birincisi və ən vacibi evdən kənarda başlayır. Məkanın təşkili üzrə peşəkar mütəxəssis Lüsi Milliqan Val deyib: "Lazımsız əşyalardan qurtulmağın ən yaxşı yolu onları ümumiyyətlə toplamamaqdır". Başqa sözlə, artıq əşyaların evə daxil olmasına imkan verməmək lazımdır.
Bu məsləhət sadə səslənsə də, çox vaxt onu həyata keçirmək deməkdən asandır. Buna görə ekspertlər evdə lazımsız əşyaların yığılmasının qarşısını almağa kömək edəcək tövsiyələr veriblər.
* Hər alış-verişi diqqətlə düşünün. Məkanın təşkili üzrə mütəxəssis Cess Rid deyir: "Nəsə almamışdan əvvəl özünüzdən soruşun: bu əşyanı yerləşdirmək üçün evdə yeriniz varmı?" Evdə nizamın təşkili üzrə şirkətin sahibi Tina Staffon isə "impulsiv deyil, düşünülmüş şəkildə alış-veriş edin" deyə tövsiyə edir.
* Artıq nələrə sahib olduğunuzu bilin. Eyni məhsulların təsadüfən təkrar alınmasının qarşısını almaq üçün Rid evdə olan əşyaların siyahısını hazırlamağı və ehtiyatların yenilənməsi üçün sistem yaratmağı tövsiyə edir.
* Əşyanın gündəlik necə istifadə olunacağını təsəvvür edin. O, evinizdə harada yerləşəcək? Ondan nə qədər tez-tez istifadə edəcəksiniz? Bəlkə onu almaq əvəzinə kirayə götürmək və ya kimdənsə borc almaq mümkündür? Bu sualların cavabları evin lazımsız əşyalarla dolmasının qarşısını almağa kömək edə bilər.
* Əşyaları almaq əvəzinə borc götürün. Ridin səliqə yaratmaqla bağlı sevimli məsləhətlərindən biri "əvvəlcə borc götürün, sonra alın" prinsipidir. O, bu vərdişi gündəlik həyatında tətbiq edir. Məsələn, paltar mübadiləsi edir və alətləri kirayə götürür. Beləliklə, mütəmadi istifadə etmədiyi əşyalar bütün il ərzində evində tozlanmır.
* Pulsuz hədiyyələrdən uzaq durun. Alış-verişdən imtina etməyə çağıran onlayn qruplarda paylanacaq çoxlu əşya ola bilər. Mağazadan pulsuz çanta və ya məhsul nümunəsi əldə edə, yaxud uşağınız fast-food restoranında yeni oyuncaq ala bilər. Lakin yalnız pulsuz olduğu üçün əşyaları toplamayın. Yenə də özünüzdən soruşun: bundan həqiqətən istifadə edəcəksinizmi?
* Poçtun yığılmasına imkan verməyin. Əlbəttə, məktubları və bağlamaları evə gətirmək lazımdır. Lakin səliqəni qorumaq üçün məktubların yığılmasına yol verməyin, qablaşdırmaları dərhal atın, jurnalları oxuduqdan sonra isə başqasına verin və ya təkrar emala göndərin.
* "Bir toxunuş qaydasına" əməl edin. Staffonun sözlərinə görə, hər hansı əşyanı əlinizə götürdükdə onu dərhal yerinə qoyun, atın və ya xeyriyyə məqsədilə bağışlayın. Əşyanı bir kənara qoyub "sonra edərəm" düşüncəsinə qapılmayın.
Bundan əlavə, ekspertlər tullantıların çeşidlənməsi üçün xüsusi zona yaratmağı tövsiyə edirlər. Milliqan Val bu zonanın evin girişində təşkil olunmasını və orada tullantılar, təkrar emal edilə bilən materiallar və ianələr üçün ayrıca qabların yerləşdirilməsini təklif edir.
Onun sözlərinə görə, belə bir sistem evə hansı əşyaların gətirildiyi barədə daha şüurlu qərar verməyə kömək edəcək.
Jalə
