Soyuq havalarda həm insanı isidən, həm də uzun müddət tox saxlayan doyurucu şorbalar süfrələrin əvəzolunmaz yeməklərindən birinə çevrilir. Ət, toyuq, tərəvəz və paxlalılarla hazırlanan bu şorbalar zəngin tərkibi ilə əsas yeməyi də əvəz edə bilər.
Demokrat.az xəbər verir ki, "Hürriyet" nəşri bölgə mətbəxinə aid olan beş doyurucu şorba reseptini təqdim edib.
Beyran şorbası
Qaziantep mətbəxinin məşhur yeməklərindən olan beyran şorbası uzun müddət bişirilən quzu əti, düyü və sarımsaqla hazırlanır. Ətin zəngin dadı və sarımsağın ətri şorbaya xüsusi ləzzət verir. Xüsusilə soyuq günlərdə isti və doyurucu yemək kimi süfrəyə təqdim olunur.
Yüksük şorbası
Yerli mətbəxin sevilən nümunələrindən olan yüksük şorbasının əsas tərkibində mantı və noxud yer alır. Tomat pastası, sarımsaq və limonla hazırlanan şorbanın suyu yüngül turşməzə dada malikdir. Bişdikcə məhsulların dadı bir-birinə qarışaraq daha zəngin bir ləzzət yaradır.
Yuvalama şorbası
Qaziantep mətbəxinin daha bir məşhur yeməyi yuvalama şorbasıdır. Şorbanın əsas xüsusiyyəti çox kiçik ölçüdə hazırlanan xəmir toplarıdır. Bu xırda köftələr ət və noxudla birlikdə bişirilir və nəticədə həm zəngin, həm də doyurucu yemək alınır.
Quru bamya şorbası
Konya mətbəxinə aid quru bamya şorbası qurudulmuş bamya, ət, limon və müxtəlif ədviyyatlarla hazırlanır. Bamyanın özünəməxsus turşməzə dadı uzun müddət bişirilərək yumşalan ətlə uyğunlaşır. Limon və ədviyyatlar isə şorbaya daha iştahaaçan dad verir.
Toyuqlu tərəvəzli tel şehriyə şorbası
Daha yüngül, lakin doyurucu seçim axtaranlar üçün toyuqlu tərəvəzli tel şehriyə şorbası hazırlamaq mümkündür. Toyuq suyu mövsümi tərəvəzlər, tel şehriyə və didilmiş toyuq əti ilə birləşdirilir. Beləliklə, həm qidalandırıcı, həm də soyuq havalarda süfrəni tamamlayan isti şorba əldə edilir.
Bu reseptlər arasında həm ənənəvi bölgə mətbəxinin zəngin dadlarını, həm də ev şəraitində daha asan hazırlanan variantları seçmək mümkündür.
Jalə
