“Naxçıvanın çox böyük turizm potensialı var. Naxçıvan qədim tarixi, zəngin mədəni irsi, təbii gözəllikləri, özünəməxsus mətbəxi və qonaqpərvər insanları ilə turistlər üçün kifayət qədər cəlbedici bölgədir. Burada həm tarixi-mədəni turizmin, həm təbiət və ekoturizmin, həm də sağlamlıq turizminin inkişafı üçün geniş imkanlar var.
Naxçıvanın üstün cəhətlərindən biri də çoxsaylı tarixi abidələrinin olmasıdır. Bölgədə müxtəlif dövrlərə aid tarixi və memarlıq nümunələri, ziyarət üçün maraqlı məkanlar, təbii landşaftlar və turistlərin diqqətini çəkə biləcək çoxsaylı obyektlər mövcuddur. Bu potensialdan düzgün istifadə olunarsa, Naxçıvanı yalnız daxili turistlər üçün deyil, xarici turistlər üçün də daha cəlbedici turizm istiqamətinə çevirmək mümkündür”.
Bu fikirləri Demokrat.az-a açıqlamasında turizm eksperti Göydəniz Qəhrəmanov deyib.
Onun sözlərinə görə, Naxçıvanın sağlamlıq turizmi imkanlarını da xüsusi qeyd etmək lazımdır:
“Burada Duzdağ mağarası kimi unikal təbii müalicə resursu mövcuddur. Duzdağ uzun illərdir tənəffüs sistemi ilə bağlı müəyyən xəstəliklərin müalicəsi məqsədilə istifadə olunan sağlamlıq turizmi məkanı kimi tanınır. Naxçıvanın iqlimi də bu istiqamətdə əlavə üstünlük yaradır. Müxtəlif ölkələrdən insanların müalicə və sağlamlıq məqsədilə bölgəyə gəlməsi üçün burada imkanlar kifayət qədər genişdir.
Bu baxımdan sağlamlıq turizminin daha da inkişaf etdirilməsi, müasir tibbi və reabilitasiya xidmətlərinin yaradılması, turistlərin həm müalicə, həm də istirahət imkanlarını bir arada əldə edə bilməsi Naxçıvana turist axınının artırılmasına ciddi töhfə verə bilər. Yəni turist yalnız bir neçə saatlıq və ya bir günlük səfərlə kifayətlənməməli, bölgədə bir neçə gün qalması üçün şərait yaradılmalıdır.
Digər tərəfdən, turizmin inkişafı üçün müasir infrastrukturun olması da çox vacibdir. Cənab Prezidentin Naxçıvana səfəri çərçivəsində 5 ulduzlu hotelin təməlinin qoyulması da bu baxımdan əhəmiyyətli addımdır. Bu, Naxçıvanda yüksək gəlirli turistlərin cəlb edilməsi, bölgədə hotelçilik sektorunun inkişaf etdirilməsi və turizm xidmətlərinin keyfiyyətinin artırılması baxımından müsbət nəticələr verə bilər.
Turist axınının artırılması üçün yalnız yeni hotellərin tikilməsi kifayət etmir. Turizm marşrutlarının hazırlanması, tarixi və təbii məkanların daha yaxşı tanıdılması, bələdçi xidmətlərinin inkişaf etdirilməsi, xarici dillərdə məlumatlandırmanın gücləndirilməsi və Naxçıvanın beynəlxalq səviyyədə daha aktiv təbliğ olunması da vacibdir. Turist bölgəyə gəldiyi zaman hara gedəcəyini, hansı xidmətlərdən istifadə edə biləcəyini və hansı marşrutla hərəkət edəcəyini rahat şəkildə bilməlidir.
Eyni zamanda Naxçıvanın zəngin mətbəxi də ayrıca turizm məhsuluna çevrilə bilər. Yerli mətbəxin, milli yeməklərin və ənənəvi məhsulların turistlərə təqdim edilməsi bölgənin fərqləndirici xüsusiyyətlərindən biri ola bilər. Çünki müasir turist üçün səyahət yalnız tarixi abidələrə baxmaqdan ibarət deyil. O, həmin bölgənin mədəniyyətini, mətbəxini və həyat tərzini də yaxından tanımaq istəyir.
Yaxın gələcəkdə Zəngəzur dəhlizinin fəaliyyətə başlayacağı təqdirdə Naxçıvan üçün əlavə turizm imkanları yarana bilər. Bu, Naxçıvanın regiondakı nəqliyyat və logistika əlaqələrinin genişlənməsinə, bölgəyə çıxış imkanlarının artmasına və turistlərin daha rahat səfər etməsinə şərait yarada bilər. Nəqliyyat əlçatanlığının artması təbii olaraq turizm üçün də mühüm üstünlükdür.
Hazırda nəqliyyat imkanlarının genişləndirilməsi istiqamətində işlər aparılır və gələcəkdə bu imkanların artması ilə Naxçıvana turist axınının da yüksələcəyi gözlənilir. Xüsusilə Türkiyə və regiondakı digər ölkələrdən gələn turistlər üçün Naxçıvanın daha əlçatan turizm istiqamətinə çevrilməsi mümkündür.
Amma əsas məsələ bundan sonra yaranacaq imkanlardan necə istifadə olunmasıdır. Turist sayı artdıqca xidmətlərin keyfiyyəti də buna uyğun yüksəlməlidir. Hotellər, restoranlar, nəqliyyat, bələdçi xidmətləri və turizm obyektləri beynəlxalq standartlara uyğunlaşdırılmalıdır. Əks halda turist axınının artması gözlənilən iqtisadi və turizm baxımından nəticəni tam şəkildə verməyə bilər.
Ümumilikdə, Naxçıvanın turizm potensialı kifayət qədər böyükdür. Tarixi-mədəni irs, təbii gözəlliklər, Duzdağ, sağlamlıq turizmi, zəngin mətbəx və qonaqpərvərlik bu bölgənin əsas üstünlükləridir. Əgər bu imkanlar müasir infrastruktur, düzgün marketinq və keyfiyyətli xidmətlərlə birləşdirilərsə, Naxçıvan Azərbaycanın əsas turizm mərkəzlərindən birinə çevrilə bilər”, - deyə Göydəniz Qəhrəmanov fikrini tamamlayıb.
