Şorbanız həddindən artıq duru alınıbsa, onu qatılaşdırmaq üçün un, xama və ya qovurma hazırlamağa ehtiyac yoxdur.
Demokrat.az xəbər verir ki, Kuchnia.mojegotowanie" nəşrinin müəllifi nənəsi Yadviqanın sınanmış üsulunu bölüşüb. Bu üsul ənənəvi qatılaşdırıcıları sadə və ucuz bir məhsulla əvəz edir.
Onun sözlərinə görə, əsas sirr irmikdədir. Təxminən 1,5 litrlik qazana cəmi iki xörək qaşığı təpəsiz irmik əlavə etmək şorbanın dadını dəyişmədən onu daha qatı və kremvari edir.
Ən vacib qayda irmiyi bir dəfəyə tökməməkdir. Şorba yüngül qaynama həddinə gətirildikdən sonra od azaldılmalı, irmik nazik axınla və davamlı qarışdırılaraq əlavə edilməlidir. Əks halda, irmik topa halında yapışacaq və onu sonradan həll etmək çətin olacaq.
İrmik əlavə edildikdən sonra şorba bir neçə dəqiqə daha bişirilməli və vaxtaşırı qarışdırılmalıdır. Bu müddətdə irmik şişərək mayeni tədricən qatılaşdırır. Əgər şorba yalnız bir qədər durudursa, əvvəlcə daha az irmik əlavə etmək tövsiyə olunur. Lazım gələrsə, sonradan artırmaq mümkündür, lakin həddindən artıq qatılaşmış şorbanı əvvəlki vəziyyətinə qaytarmaq çətindir.
İrmiyin təsiri onun tərkibindəki nişasta ilə bağlıdır. İsti su və yüksək temperaturun təsiri altında nişasta şişir və jelatinləşərək mayeni daha qatı və məxməri konsistensiyalı edir. Bu üsul xamanın verdiyi süd dadını və yağlılığı yaratmasa da, alınan tekstura və toxluq hissi baxımından ona bənzəyir.
Yadviqanın tövsiyəsinə görə, irmik tərəvəz şorbası, gül kələm şorbası, pomidor şorbası, qulyaş şorbası, yarmalı şorbalar və tərəvəz krem-şorbaları üçün uyğundur.
Bu üsulun üstünlüklərindən biri də odur ki, ayrıca qovurma hazırlamağa və ya unu soyuq suda həll etməyə ehtiyac qalmır. Bundan əlavə, irmiyin neytral dadı tərəvəz, ət və ədviyyatların təbii ətrini dəyişmir.
Jalə Demokrat.az
