Erkən şam yeməyi ilə bağlı “TikTok” trendinin sağlamlıq üçün faydalı ola biləcəyi bildirilib.
Demokrat.az xəbər verir ki, “The Independent” nəşrinin yazdığına görə, mütəxəssislər yatmazdan bir neçə saat əvvəl şam yeməyi yeməyin yuxunun keyfiyyətini artırdığını qeyd edirlər.
Son vaxtlar sosial şəbəkədə geniş yayılan “early bird dinners” (erkən şam yeməyi) trendi dietoloqlar və yuxu üzrə mütəxəssislər tərəfindən də dəstəklənir. Onların sözlərinə görə, bu vərdiş orqanizmin gecə istirahətinə daha yaxşı hazırlaşmasına kömək edir.
Mütəxəssislər xəbərdarlıq edirlər ki, yatmazdan dərhal əvvəl qəbul edilən qida qıcqırma, həzm pozuntuları və digər narahatlıqlara səbəb ola bilər.
Sertifikatlı terapevt və “Magnolia Functional Wellness” klinikasının tibbi direktoru Fərhan Abdulla bildirib ki, son qida qəbulu yatmazdan təxminən 4–5 saat əvvəl başa çatmalıdır.
Onun sözlərinə görə, insan yeməkdən dərhal sonra yatdıqda, xüsusilə də yağlı və ya ədviyyatlı qidalar qəbul edibsə, həzm sistemi aktiv işləməyə davam edir.
“Bu zaman mədə artıq turşu ifraz edə bilər ki, bu da köp, narahatlıq və ya qazların toplanması nəticəsində qida borusunun aşağı hissəsinə təzyiq yaradaraq turşu reflüksünə səbəb ola bilər”, deyə həkim bildirib.
Abdulla qeyd edib ki, şam yeməyindən sonra orqanizmə bir qədər vaxt verilməsi həzm sisteminin sakitləşməsinə imkan yaradır və bu da daha tez yuxuya getməyə, gecə ərzində oyanmaların azalmasına kömək edir.
Yuxu təbabəti üzrə mütəxəssis Aleks Dimitriu isə bildirib ki, bu, sosial şəbəkələrdə yayılan nadir trendlərdən biridir ki, elmi əsaslara söykənir.
“Erkən şam yeməyi yuxunu yaxşılaşdırır, çünki orqanizm istirahət zamanı qidanı intensiv şəkildə həzm etməyə məcbur qalmır. Bundan əlavə, turşu reflüksü riskini də azaldır”, deyə o, “Healthline”a açıqlamasında bildirib.
Qeydiyyatdan keçmiş dietoloq Culiya Zumpano da bu yanaşmanı dəstəkləyib. Onun sözlərinə görə, erkən şam yeməyi qidanın həzm olunmasına və qanda şəkərin səviyyəsinin normallaşmasına imkan verir. Bu isə insanın dolu mədə və yüksək qlükoza səviyyəsi ilə yatmasının qarşısını alır.
Mütəxəssislər bildirirlər ki, hər kəs erkən şam yeməyi edə bilmir. Belə hallarda yeməkdən dərhal sonra uzanmamaq tövsiyə olunur.
Onların fikrincə, 10–20 dəqiqəlik gəzinti və ya mətbəxin yığışdırılması, ev işləri kimi yüngül fiziki fəaliyyət həzmi sürətləndirə bilər.
Bundan başqa, axşam saatlarında kofeinli içkilərdən və şəkəri yüksək olan məhsullardan uzaq durmaq məsləhət görülür. Çünki bu qidalar da yuxuya getməyi çətinləşdirə bilər.
Jalə Demokrat.az
