Dostlarla problemləri və yaşanan hissləri bölüşmək insanların çoxunda olan təbii vərdişdir. Lakin şəxsi münasibətlər barədə həddindən artıq səmimi danışmaq bəzən gözlənilməz mənfi nəticələrə səbəb ola bilər.
Demokrat.az xəbər verir ki, bu barədə “YourTango” yazır.
Məqalədə qeyd olunur ki, tərəfdaşla mübahisədən sonra rəfiqədən məsləhət və ya dəstək istəmək tamamilə normaldır. Bununla belə, müəllif sağlam dəstək axtarışı ilə şəxsi həyatın həddindən artıq detallı şəkildə açıqlanması arasında sərhəd olduğunu vurğulayır.
“Çox böyük həcmdə məlumat paylaşmaq, əslində heç yaranmamalı olan problemlər yaratmaq deməkdir”, deyə müəllif qeyd edir.
Nəşr qadınların münasibətləri barədə rəfiqələri ilə həddindən artıq açıq danışmasının problemlərə səbəb ola biləcəyi bir neçə səbəbi göstərir:
Rəfiqələr tərəfdaşa qarşı mənfi münasibət bəsləməyə başlaya bilər
Müəllifin izahına görə, qadınlar münaqişədən sonra tez-tez rəfiqələrinə zəng edərək hadisələri öz baxışlarından danışırlar. Daha sonra sevgililər barışa və mübahisəni keçmişdə qoya bilərlər, lakin dostlar çox vaxt həmin hadisə ilə bağlı yalnız ilk mənfi məlumatları yadda saxlayırlar.
Nəticədə onlar rəfiqələrinin tərəfdaşını münasibətlərdəki ən pis anlar prizmasından qiymətləndirməyə başlayırlar, hətta problem çoxdan həll olunsa belə.
Ətrafdakılar ayrılmaq üçün israr etməyə başlayır
Dostlar münasibətlər barədə nə qədər çox detal bilsələr, bir o qədər çox öz fikirlərini bildirməyə başlayırlar. Bəziləri dərhal ayrılmağı məsləhət görə bilər, digərləri isə bütün günahın tərəfdaşda olduğunu düşünə bilər.
Nəticədə insan əvvəlcə dəstək almaq üçün müraciət etdiyi şəxslərin qarşısında sevdiyi insanı müdafiə etmək məcburiyyətində qala bilər.
Münasibətlər yalnız pis anlara görə qiymətləndirilir
Müəllif bildirir ki, davamlı şikayətlər tərəfdaş haqqında birtərəfli təsəvvür yaradır. Ayrı-ayrı hadisələr rəfiqələrin gözündə insanın daimi xarakter xüsusiyyətinə çevrilə bilər, halbuki əslində həmin hallar istisna ola bilər.
Tam kontekst olmadıqda tanışlar insan haqqında yanlış nəticələr çıxara bilərlər.
Dostlarla tərəfdaş arasında rəqabət yaranır
Məqalədə qeyd olunur ki, sağlam münasibətlər romantik əlaqələrlə dostluq arasında tarazlıq tələb edir. Əgər rəfiqələr daim mənfi hadisələr eşidirlərsə, onlar həmin insanı tərəfdaşından daha çox dəstəklədiklərini düşünməyə başlaya bilərlər.
Eyni zamanda sevilən insan şəxsi mübahisələrin kənar şəxslərin müzakirəsinə çıxarılmasından narahatlıq keçirə bilər.
Həddindən artıq açıqlıq etibarı sarsıdır
Müəllif vurğulayır ki, münasibətlərdə baş verən hər hadisənin kənar dinləyicilərə ehtiyacı yoxdur, xüsusilə də şəxsi məsələlərdən söhbət gedirsə.
Belə detalları davamlı olaraq rəfiqələrlə bölüşmək zamanla cütlük arasındakı etibarı zəiflədə bilər.
Jalə Demokrat.az
