Sağlam qidalanmaq istəyənlər üçün zülal əsas qida maddələrindən biridir. Yumurta zülalın ən yaxşı mənbələrindən hesab olunsa da, bəzi məhsullar bu baxımdan onu geridə qoyur.
Demokrat.az xəbər verir ki, "Verywell Health" nəşrinin diyetoloq Elizabet Barns tərəfindən yoxlanılmış məqaləsinə əsasən, ABŞ Kənd Təsərrüfatı Nazirliyinin məlumatına görə, bir iri yumurtada 6,3 qram zülal və 72 kilokalori var.
Mütəxəssislər yumurtadan daha çox və ya ən azı onun qədər zülal ehtiva edən yeddi qidanı təqdim ediblər.
1. "Araxıs" yağı
İki xörək qaşığı "araxıs" yağında 7–8 qram zülal var. Bu məhsul meyvələr və ya yulaf sıyığı ilə birlikdə istifadə oluna bilər. Alarkən tərkibini diqqətlə yoxlamaq tövsiyə olunur, çünki bəzi növlərinə əlavə şəkər qatılır.
2. Qara lobya
Yarım stəkan konservləşdirilmiş qara lobyada 7 qram zülal mövcuddur. Bundan əlavə, o, lif, maqnezium, dəmir və kaliumla zəngindir. Mütəxəssislər konserv məhsullarında natriumun yüksək ola biləcəyini nəzərə almağı məsləhət görürlər.
3. Konservləşdirilmiş ton balığı
85 qram konservləşdirilmiş ton balığında 16,2 qram zülal var. Məhsul həmçinin dəmir, maqnezium, sink, B qrupu vitaminləri və ürək sağlamlığını dəstəkləyən omeqa-3 yağ turşularının yaxşı mənbəyidir.
Mütəxəssislər bildirirlər ki, xüsusilə hamilə qadınlar civə tərkibi yüksək ola bilən ağ ton balığını məhdud miqdarda qəbul etməlidirlər. Daha təhlükəsiz seçim kimi "skipjack" və yüngül ton balığı göstərilir.
4. Tam yağlı süd
Bir stəkan tam yağlı süddə 8 qram zülal və təxminən 290 milliqram kalsium var.
Mütəxəssislər qeyd edirlər ki, südü təkcə içki kimi deyil, qəhvəyə və ya tam taxıllı səhər yeməyinə əlavə etməklə də əlavə zülal qəbul etmək mümkündür.
5. Badam
Dörddəbir stəkan badam təxminən 6,4 qram zülal ehtiva edir. Badam həmçinin lif, E vitamini və ürək sağlamlığı üçün faydalı olan doymamış yağlarla zəngindir.
Onu qəlyanaltı kimi yemək və ya salatlara, yoqurda əlavə etmək tövsiyə edilir.
6. Bərk tofu
85 qram bərk tofuda 7–8 qram zülal var. Bu məhsul heyvan mənşəli zülalların yaxşı alternativi hesab olunur və qızartmalarda, salatlarda, eləcə də toyuq və mal əti əvəzinə istifadə edilə bilər.
7. Balqabaq tumu
Dörddəbir stəkan balqabaq tumunda 10 qram zülal mövcuddur. Bundan əlavə, o, maqnezium, sink və liflə zəngindir.
Mütəxəssislər bildirirlər ki, qabıqlı balqabaq tumu daha çox lif ehtiva edir və ürək-damar sağlamlığının qorunmasına kömək edir.
Diyetoloqlar vurğulayırlar ki, bu məhsulların balanslaşdırılmış qidalanma rasionuna daxil edilməsi orqanizmin zülal ehtiyacını ödəməyə və ümumi sağlamlığın qorunmasına dəstək ola bilər.
Jalə Demokrat.az
