Banan uzun illər kaliumun əsas mənbələrindən biri hesab olunsa da, mütəxəssislər bildirirlər ki, bu mineralın daha yüksək miqdarda olduğu ən azı 20 qida məhsulu mövcuddur.
Demokrat.az xəbər verir ki, “Health” nəşrinin məlumatına görə, orta ölçülü bir bananda təxminən 375 mq kalium var ki, bu da gündəlik tələbatın təxminən 11–14 faizini qarşılayır. Halbuki bəzi tərəvəzlər, paxlalılar və süd məhsulları orqanizmə bundan xeyli çox kalium təmin edir.
Kalium ürəyin, əzələlərin, sinir sisteminin və böyrəklərin normal fəaliyyəti üçün vacib minerallardan biridir. ABŞ Milli Səhiyyə İnstitutları qeyd edir ki, böyrək xəstəliklərindən əziyyət çəkən şəxslər kalium qəbulunu məhdudlaşdırmalı və qidalanmada dəyişiklik etməzdən əvvəl həkimlə məsləhətləşməlidirlər.
Kaliumla zəngin məhsullar
Siyahıya 961 mq kalium ehtiva edən bişmiş yarpaq çuğunduru (mangold) başçılıq edir. Bundan əlavə, bir porsiya gündəlik K vitamini tələbatının 400 faizindən çoxunu təmin edir.
İkinci yerdə bir ədədində 945 mq kalium olan avokado qərarlaşıb. O, həmçinin ürək sağlamlığı üçün faydalı olan monodoymamış yağlarla, fol turşusu və maqneziumla zəngindir.
Digər kaliumla zəngin məhsullar bunlardır:
* soya paxlası – 886 mq (bir stəkan bişmiş); * akorn balqabağı – 896 mq; * şirin kartof – 855 mq (bir iri bişmiş yumru); * ispanaq – 839 mq (bir stəkan bişmiş); * quru ərik – 755 mq (yarım stəkan); * mərci – 731 mq (bir stəkan bişmiş); * qara lobya – 611 mq; * kişmiş – 600 mq; * çuğundur yarpağı – 580 mq; * adi yoqurt – 573 mq; * balqabaq püresi – 564 mq; * pomidor püresi – 550 mq; * kokos südü – 497 mq; * portağal şirəsi – 457 mq; * qızılbalıq – 429 mq (100 qram); * nar – 410 mq; * süd (1 faiz yağlı) – 391 mq.
Bu məhsulların əksəriyyəti həmçinin lif, A, C, E və K vitaminləri, maqnezium, dəmir, sink, selen və omeqa-3 yağ turşuları kimi digər faydalı qida maddələri ilə də zəngindir.
Həkimlər ehtiyatlı olmağa çağırırlar
Məqalədə kalium əsaslı duz əvəzedicilərinə də diqqət çəkilir. Belə məhsulların bir çay qaşığında 440–2800 mq arasında kalium ola bilər. Buna görə də onların istifadəsi yalnız həkim tövsiyəsi ilə məqsədəuyğundur.
