"Meta"nın aldığı yeni patent istifadəçilərin səs tonunu, ətraf mühitdəki səsləri və rəqəmsal fəaliyyətlərini təhlil edərək onların emosional vəziyyətini müəyyən etməyi hədəfləyən süni intellekt sistemini təsvir edir.
Demokrat.az xəbər verir ki, texnologiya hələlik kommersiya məhsuluna çevrilməsə də, məxfilik və şəxsi məlumatların qorunması ilə bağlı müzakirələri yenidən gündəmə gətirib.
Şirkətin patent sənədinə əsasən, sistem istifadəçinin nə dediyini deyil, bunu necə ifadə etdiyini də qiymətləndirə biləcək. Süni intellekt səs yazılarını günün vaxtı, məkan, istifadəçinin fəaliyyəti və rəqəmsal qarşılıqlı əlaqələri ilə birlikdə təhlil edəcək.
Bundan əlavə, danışıq mətnə çevrilərkən səs tonu, gülüş, ah çəkmə və digər qeyri-verbal səs siqnalları da nəzərə alınacaq.
Təkcə danışıq deyil, səs tonu da təhlil ediləcək
"Meta"nın üzərində işlədiyi sistem yalnız danışığın məzmununu deyil, istifadəçinin səsindəki dəyişiklikləri, gülməsini, ah çəkməsini və danışıq tərzini də süni intellekt modelləri vasitəsilə təhlil edə biləcək.
Bu məlumatlar istifadəçinin olduğu mühit və rəqəmsal davranışları ilə eyni zaman xətti üzərində birləşdirilərək onun həmin andakı emosional vəziyyəti barədə daha dəqiq nəticələrin əldə edilməsinə imkan verəcək.
Patent sənədində qeyd olunur ki, müxtəlif sensorlardan əldə edilən məlumatların eyni vaxtda təhlili emosiyaların müəyyən edilməsinin dəqiqliyini artıra bilər. Beləliklə, sistem yalnız bir səs yazısına deyil, istifadəçinin ümumi vəziyyətinə əsaslanaraq qiymətləndirmə aparacaq.
Fitnes və sağlamlıq sahəsində tətbiq oluna bilər
Patentdə göstərilən mümkün istifadə sahələrindən biri fərdiləşdirilmiş fitnes və sağlamlıq xidmətləridir.
"Meta"nın fikrincə, süni intellekt istifadəçinin emosional vəziyyətini nəzərə alaraq məşq proqramlarını və tövsiyələri dəyişə bilər. Məsələn, səs təhlilinə əsasən istifadəçinin yorğun, stressli və ya həvəssiz olduğu müəyyən edilərsə, ona uyğun fərqli məşq planı təklif oluna bilər.
Sənəddə həmçinin qeyd edilir ki, ənənəvi fərdi məşqçilər bədən duruşunun və hərəkətlərin təhlilində müəyyən məhdudiyyətlərlə üzləşə bilirlər. Təklif olunan sistem isə müxtəlif məlumat mənbələrini birləşdirərək daha ətraflı qiymətləndirmə təqdim edə bilər.
Süni intellekt müəyyən vaxtlarda istifadəçini dinləyə bilər
Patent sənədinə görə, süni intellekt köməkçisi əvvəlcədən müəyyən edilmiş vaxtlarda istifadəçinin ətrafındakı səsləri dinləyə bilər. Bu zaman səs tonu, gülüş və ah çəkmə kimi siqnallar təhlil ediləcək.
Sistem həmçinin dərman qəbulu vaxtı kimi məlumatları səs qeydləri ilə əlaqələndirə və istifadəçinin müəyyən dövrlərdəki emosional vəziyyətini əks etdirən hesabatlar hazırlaya bilər.
Mütəxəssislərin fikrincə, belə texnologiyalar daha fərdiləşdirilmiş xidmətlərin göstərilməsinə imkan yaratsa da, gündəlik həyatda toplanan səs və davranış məlumatlarının davamlı şəkildə təhlil olunması onların necə saxlanılması və istifadə edilməsi ilə bağlı ciddi məxfilik sualları yaradır.
"Meta": Hər patent məhsula çevrilmir
"Meta" məsələ ilə bağlı açıqlamasında patent müraciətlərinin gələcəkdə istifadə oluna biləcək ideyaların hüquqi qorunması məqsədilə həyata keçirilən standart prosedur olduğunu bildirib.
Şirkət nümayəndəsi vurğulayıb ki, alınan hər patent gələcəkdə mütləq hazırlanacaq və ya bazara çıxarılacaq məhsul anlamına gəlmir.
