Tərəvəzlərin istifadə edilməzdən əvvəl yuyulması qida təhlükəsizliyinin vacib tərkib hissəsidir. Bəzi insanlar hesab edirlər ki, qida sodası əlavə etmək bu prosesi daha effektiv edir və səthdəki çirkin, eləcə də bəzi pestisid qalıqlarının təmizlənməsinə kömək edir.
Demokrat.az xəbər verir ki, “Martha Stewart” nəşrinin yazdığına görə, mütəxəssislər qida sodası məhlulundan hansı hallarda istifadə etməyin məqsədəuyğun olduğunu və bunu necə təhlükəsiz şəkildə etməyin lazım gəldiyini izah ediblər.
Ekspertlər bildirirlər ki, qida sodası zəif qələvi məhlul yaradır. Bu məhlul tərəvəzlərin səthindəki çirki yumşalda və bəzi pestisid qalıqlarının yuyulmasını asanlaşdıra bilər.
Sertifikatlı qida alimi, “Jessica Gavin” şirkətinin təsisçisi Cessika Qevinin sözlərinə görə, araşdırmalar göstərib ki, qida sodası xüsusilə tiabendazol kimi funqisidlərin və fosmet kimi insektisidlərin səthdəki qalıqlarını parçalayaraq onların yuyulmasını asanlaşdıra bilər.
Lakin mütəxəssislər vurğulayırlar ki, qida sodası meyvə və ya tərəvəzin daxilinə artıq nüfuz etmiş pestisid qalıqlarını aradan qaldıra bilmir.
Hansı tərəvəzlər üçün uyğundur?
Qida sodası əsasən sərt quruluşlu tərəvəzlər üçün daha uyğundur. Zərif məhsulların uzun müddət məhlulda saxlanılması isə onların teksturasına və keyfiyyətinə mənfi təsir göstərə bilər.
Diyetoloq Kimberli Beyker qeyd edir ki, həddindən artıq islatmaq və ya intensiv yuma yarpaqlı və həssas tərəvəzləri zədələyə bilər.
Mütəxəssislər onu da xatırladırlar ki, qida sodası dezinfeksiyaedici vasitə deyil. O, çirki və bəzi pestisid qalıqlarını təmizləməyə kömək etsə də, bakteriyaları, virusları və ya parazitləri məhv etmir.
“Stop Foodborne Illness” alyansının direktoru, elmlər doktoru Vanessa Koffmanın sözlərinə görə, qida sodası yalnız bəzi səthi çirkləri yumşalda bilər. Lakin məhsulun çatlarında qalan və ya daxilinə nüfuz etmiş xəstəliktörədici mikroorqanizmləri aradan qaldırmır.
O, həmçinin yuyulmuş məhsulların çarpaz çirklənmənin qarşısını almaq üçün çiy və yuyulmamış məhsullardan ayrı saxlanılmasını tövsiyə edir.
Qida sodasından necə düzgün istifadə etmək olar?
Cessika Qevin aşağıdakı qaydaya əməl etməyi tövsiyə edir:
* 2 stəkan soyuq suya 1 çay qaşığı qida sodası əlavə edin; * məhlulu böyük qabda hazırlayın; * tərəvəzləri bütöv şəkildə məhlula salın; * maksimum 15 dəqiqə saxlayın və arabir qarışdırın; * sonra onları axar soyuq su altında yaxşıca yuyun; * saxlamazdan və ya istifadə etməzdən əvvəl qurudun.
Lazım olduqda məhlulun həcmini artırmaq və ya azaltmaq mümkündür. Bunun üçün sadəcə soda ilə su arasındakı eyni nisbəti qorumaq kifayətdir.
Qida sodası ilə yumaq tövsiyə olunan tərəvəzlər
* brokoli; * gül kələmi; * kartof; * yerkökü; * xiyar; * şirin bibər.
Qida sodası ilə yuyulması məsləhət görülməyən tərəvəzlər
* ispanaq; * kələm kələmi (kale); * kahı; * göbələk; * digər zərif yarpaqlı göyərtilər.
Jalə Demokrat.az
