Bakının Sabunçu rayonunda yerləşən şadlıq saraylarından birinin fəaliyyəti dayandırılıb. Fövqəladə Hallar Nazirliyinin (FHN) həyata keçirdiyi yoxlamalar obyektin yanğın təhlükəsizliyi qaydalarına cavab vermədiyini üzə çıxarıb.
Bakıxanov qəsəbəsi, Şamil Kamilov küçəsində yerləşən “Səbinə” şadlıq sarayında aparılan araşdırmalar zamanı ciddi qanun pozuntuları qeydə alınıb. Müəyyən edilib ki, obyektdə yanğın barədə məlumat verən avtomatik sistemlər tam quraşdırılmayıb və elektrik təsərrüfatı mövcud standartlara uyğun deyil. Bundan başqa, müəssisədə ilkin yanğınsöndürmə vasitələri, yanğın kranları və şlanqlar yoxdur.
FHN əməkdaşları şadlıq sarayında yanğın su hovuzunun olmadığını və insanların təhlükə zamanı binadan çıxması üçün nəzərdə tutulan təxliyə planının hazırlanmadığını da aşkarlayıblar. Bütün bu nöqsanlar insan həyatı üçün birbaşa təhlükə yaratdığı üçün obyektin fəaliyyətinin dayandırılması barədə qəti qərar verilib. Müvafiq sənədin surəti artıq rəhbərliyə təqdim olunub.
Demokrat.az
