"Özəl təqaüd fondlarının yaradılması artıq 10–15 ildir müzakirə olunur, lakin hələlik qanun layihəsi və ya rəsmi təklif yoxdur. Belə fondların yaradılması vacibdir, çünki vətəndaşlara seçim imkanı verməli və DSMF-nin bazarda yeganə oyunçu olmamasını təmin etməlidir. Fondlar qiymətli kağızlar bazarında fəaliyyət göstərərək investisiya fonduna çevrilə bilər və bu, digər sahələrdə islahatları da tələb edir".
Bunu Demokrat.az-a açıqlamasında iqtisadçı ekspert Natiq Cəfərli deyib.
O, bildirib ki, kapitala çıxış imkanları da uzun müddət müzakirə olunub və bu, asanlıqla həll edilə bilər:
"Vətəndaş öz vəsaitini toplayır, DSMF-yə ödəyir və həyat boyunca həmin vəsaitə çıxış imkanı olmalıdır. Dünyanın bir çox ölkəsində, o cümlədən Türkiyə və Gürcüstanda, bu mexanizm sadə şəkildə işləyir. Hazırda isə vəsaitə çıxış məsələsi çox qəlizləşdirilib və bu, həm vətəndaşlar, həm də sistem üçün anlaşılmazdır".
Əfsanə Kamal Demokrat.az
