“Az istifadə edilmiş avtomobillərin gətirilməsinə üstünlük verilir” — SƏBƏB

Ötən il ərzində ölkəyə statistik dəyəri 1 milyard 680,6 milyon ABŞ dolları dəyərində 95 min 971 avtomobil idxal edilib. Dövlət Gömrük Komitəsinin illik hesabatına əsasən 2022-ci ilin müvafiq dövrü ilə müqayisədə ölkəyə idxal olunan avtomobillərin sayı 28,7 faiz və ya 21 min 394 ədəd, dəyər ifadəsində isə 58,9 faiz və ya 622,860 milyon dollar artım olub. Hesabatda qeyd olunub ki, sürücü daxil olmaqla 10 nəfər və ya daha çox adam daşımaq üçün nəzərdə tutulmuş mühərrikli nəqliyyat vasitələrinin sayı 163 olub. Bu avtomobillərin dəyəri 9 778.68 min ABŞ dollar təşkil edib.

Nəqliyyat eksperti Aslan Əsədov Demokrat.az-a açıqlamasında idxal olunan avtomobillərin dəyərinin artmasının səbəblərinə aydınlıq gətirib:

“Əvvəllər, məsələn, dəyəri 5 min manata olan maşından 500 ədəd gətirilirdi, indi isə 10 min manatlıq 100 ədəd maşın gətirilir. Yəni, indi daha çox bahalı avtomobillər gətirilir ölkəyə. Bunun da səbəbi istismar müddəti 10 ili keçmiş avtomobillər üçün utilizasiya haqqının tətbiq olunmasıdır. Vətəndaşlar baha da olsa daha az istifadə edilmiş avtomobilləri almağa üstünlük verirlər. Az istifadə edilmiş avtomobillərin qiyməti də digərlərinə nisbətən daha baha olur. Maya dəyərinin üzərinə əgər avtomobil şirkət vasitəsilə alınıbsa, şirkətin haqqı, daşınma pulu, gömrük rüsumu da əlavə edildikdə ümumi qiymətə təsir edir”.

Törə Zeynallı Demokrat.az